પંચમહાલ જિલ્લાને ક્ષય રોગથી સંપૂર્ણપણે મુક્ત કરવાના મહત્ત્વપૂર્ણ સંકલ્પ સાથે ગોધરા ખાતે એક નવી પહેલ હાથ ધરવામાં આવી છે. જિલ્લા પંચાયત કચેરી ખાતે ‘ટીબી મુક્ત ભારત અભિયાન’ને વધુ સઘન અને વેગવંતું બનાવવાના શુભ આશય સાથે વિશેષ ‘જોશ’ ટીમનો વિધિવત શુભારંભ કરવામાં આવ્યો હતો. આ અભિયાન અંતર્ગત છેવાડાના માનવી સુધી આરોગ્યલક્ષી સેવાઓ પહોંચાડવા અને ક્ષય રોગના દર્દીઓને સમયસર ઓળખીને તેમને ઉત્તમ સારવાર ઉપલબ્ધ કરાવવા માટે આયોજનબદ્ધ રીતે નક્કર પગલાં ભરવામાં આવશે.
જિલ્લામાં ગઠિત કરવામાં આવેલી આ વિશેષ ‘જોશ’ ટીમમાં વર્ગ-૧ કક્ષાના એક નોડલ અધિકારી ઉપરાંત પાંચ ‘માય ભારત’ સ્વયંસેવકો અને પાંચ ‘એનસીસી’ કેડેટ્સનો સમાવેશ કરવામાં આવ્યો છે. આ ઊર્જાવાન ટીમ સમગ્ર જિલ્લામાં ઘરે-ઘરે ફરીને લોકોમાં વ્યાપક જનજાગૃતિ ફેલાવશે. તે ઉપરાંત ક્ષય રોગના સંભવિત દર્દીઓની ત્વરિત ઓળખ કરી તેમના ઝડપી નિદાન અને વિનામૂલ્યે સારવારની પ્રક્રિયામાં સક્રિય સહયોગ આપશે. ગોધરા ખાતે યોજાયેલા આ કાર્યક્રમ દરમિયાન ઉપસ્થિત સૌ મહાનુભાવોએ નવી દિલ્હી ખાતેથી આયોજિત રાષ્ટ્રીય સ્તરના કાર્યક્રમનું જીવંત પ્રસારણ પણ નિહાળ્યું હતું, જેમાં રાષ્ટ્રવ્યાપી સ્તરે જોશ ટીમ અને ડિજિટલ જોશ એપ્લિકેશનનું લોકાર્પણ કરવામાં આવ્યું હતું.
આ કાર્યક્રમમાં જિલ્લામાં ક્ષય નિર્મૂલન ક્ષેત્રે ઉત્કૃષ્ટ કામગીરી કરીને સંપૂર્ણપણે ટીબી મુક્ત જાહેર થયેલી ગ્રામ પંચાયતોના સરપંચોને મહાનુભાવોના વરદહસ્તે પ્રમાણપત્ર આપી સન્માનિત કરવામાં આવ્યા હતા. આ સાથે જ ક્ષય રોગ સામેની લડાઈમાં નિષ્ઠાપૂર્વક નોંધપાત્ર યોગદાન આપનારા કર્મઠ ‘ટીબી ચેમ્પિયન્સ’નું પણ પ્રશસ્તિપત્ર આપી વિશેષ બહુમાન કરવામાં આવ્યું હતું. આ ગરિમાપૂર્ણ પ્રસંગે રાજ્યસભા સાંસદ જશવંતસિંહ પરમાર, લોકસભા સાંસદ રાજપાલસિંહ યાદવ અને જિલ્લા વિકાસ અધિકારી પ્રણવ વિજયવર્ગીય સહિત આરોગ્ય વિભાગના ઉચ્ચ અધિકારીઓ તથા આરોગ્ય કર્મચારીઓ મોટી સંખ્યામાં ઉપસ્થિત રહ્યા હતા.
