છોટાઉદેપુર જિલ્લામાં વિદ્યાર્થીઓની સુષુપ્ત શક્તિઓને બહાર લાવવા તેમજ તેમનામાં સર્જનાત્મક અને રચનાત્મક કૌશલ્યનો વિકાસ થાય તે હેતુથી શિક્ષણ વિભાગ દ્વારા વિશેષ પહેલ કરવામાં આવી છે. દેશના ભાવિ નિર્માણ અને નવી પેઢીમાં રાષ્ટ્રદાઝની ભાવના કેળવવાના ઉદ્દેશ સાથે 'વિકસિત ભારત ૨૦૪૭' વિષય હેઠળ જિલ્લા કક્ષાની વક્તૃત્વ સ્પર્ધાનું ભવ્ય આયોજન કરવામાં આવ્યું હતું. આ સ્પર્ધામાં સમગ્ર જિલ્લામાંથી વિવિધ શાળાઓના ઉત્સાહી વિદ્યાર્થીઓએ ભાગ લઈ રાષ્ટ્રનિર્માણ અંગે પોતાના મૌલિક વિચારો ઉત્કૃષ્ટ શૈલીમાં રજૂ કર્યા હતા.
આ સ્પર્ધામાં નસવાડી તાલુકાના કોસીન્દ્રા ગામની વતની અને પીપલસટ સ્થિત બરોડા પબ્લિક સ્કૂલમાં ધોરણ ૭ માં અભ્યાસ કરતી પ્રતિભાશાળી વિદ્યાર્થિની પટેલ મિશ્રી રીન્કુકુમારે શ્રેષ્ઠ પ્રદર્શન દાખવ્યું હતું. મિશ્રીએ પોતાની ધારદાર વક્તૃત્વ શૈલી, સચોટ શબ્દભંડોળ અને આત્મવિશ્વાસપૂર્ણ રજૂઆત દ્વારા સમગ્ર જિલ્લામાં પ્રથમ ક્રમાંક પ્રાપ્ત કરીને શાળા તેમજ સમગ્ર વિસ્તારનું નામ રોશન કર્યું છે. તેની આ ગૌરવપૂર્ણ સિદ્ધિ બદલ શાળા પરિવાર, શિક્ષકો અને સ્નેહીજનોમાં હર્ષની લાગણી છવાઈ ગઈ છે.
સ્પર્ધાના સફળ સંચાલન બાદ છોટાઉદેપુર ખાતે આવેલી એસ.એફ. હાઈસ્કૂલ ખાતે વિજેતા વિદ્યાર્થીઓ માટે એક વિશેષ સન્માન સમારોહનું આયોજન કરવામાં આવ્યું હતું. આ કાર્યક્રમ જિલ્લા પંચાયતના પ્રમુખ ઉપેન્દ્ર રાઠવાના અધ્યક્ષસ્થાને અને સ્થાનિક સાંસદ જશુભાઈ રાઠવાની પ્રેરક ઉપસ્થિતિમાં સંપન્ન થયો હતો. આ પ્રસંગે ઉપસ્થિત મહાનુભાવોના હસ્તે પ્રથમ ક્રમે વિજેતા બનેલી વિદ્યાર્થિની મિશ્રી પટેલ સહિત અન્ય પ્રતિભાશાળી બાળકોને રોકડ પુરસ્કાર અને પ્રશસ્તિપત્ર એનાયત કરી પ્રોત્સાહિત કરાયા હતા.
કાર્યક્રમમાં ઉપસ્થિત મહાનુભાવોએ સંબોધન કરતાં જણાવ્યું હતું કે, આવી સ્પર્ધાઓથી વિદ્યાર્થીઓમાં કેવળ અભિવ્યક્તિનો જ વિકાસ નથી થતો પરંતુ રાષ્ટ્ર પ્રત્યેની જવાબદારીનું પણ નિર્માણ થાય છે. આવનારા સમયમાં ભારતને વૈશ્વિક સ્તરે અગ્રેસર બનાવવા માટે યુવા પેઢીનું વૈચારિક ઘડતર અત્યંત અનિવાર્ય છે. અંતમાં ઉપસ્થિત સર્વે આગેવાનો અને શિક્ષણવિદોએ વિજેતા તમામ વિદ્યાર્થીઓને ઉજ્જવળ ભવિષ્યની હાર્દિક શુભેચ્છાઓ પાઠવી હતી.
