દેશની આઈટી રાજધાની ગણાતા બેંગલુરુ શહેરમાં વધતી જતી મોંઘવારી અને રહેઠાણના આસમાને આંબતા ખર્ચને લઈને એક નવો વિવાદ છેડાયો છે. બેંગલુરુમાં રહેતી એક યુવતીએ સોશિયલ મીડિયા પર ખુલ્લેઆમ ચેતવણી આપતા જણાવ્યું છે કે જો કોઈ વ્યક્તિ દર મહિને ઓછામાં ઓછા એક લાખ રૂપિયા કમાતી ન હોય, તો તેણે આ શહેરમાં સ્થળાંતર કરવાનો વિચાર પણ ન કરવો જોઈએ. યુવતીના આ નિવેદને દેશભરના નોકરીયાતો અને મધ્યમવર્ગીય પરિવારો વચ્ચે જોરદાર ચર્ચા જગાવી છે.
યુવતીએ શહેરમાં રહેવાની દૈનિક મુશ્કેલીઓ વર્ણવતા જણાવ્યું હતું કે બેંગલુરુમાં ઘરનું ભાડું સામાન્ય માણસની પહોંચ બહાર જઈ ચૂક્યું છે. અહીં એક સામાન્ય ફ્લેટ ભાડે લેવા માટે પણ લાખો રૂપિયાની ડિપોઝિટ ચૂકવવી પડે છે અને ત્યારબાદ દર મહિને તોતિંગ ભાડું ભરવું પડે છે. આ ઉપરાંત રોજિંદા પરિવહન, કરિયાણું, વીજળી અને અન્ય જીવનજરૂરી સુવિધાઓ પણ એટલી મોંઘી થઈ ગઈ છે કે ઓછી કે મધ્યમ આવક ધરાવતા લોકો માટે મહિનાના અંતે એક રૂપિયો પણ બચાવવો અસંભવ બની જાય છે. સતત વધતી મોંઘવારી મધ્યમ વર્ગની કમર તોડી રહી છે.
આ નિવેદન સામે આવ્યા બાદ ડિજિટલ મંચો પર મતમતાંતર શરૂ થઈ ગયા છે. અનેક લોકોએ યુવતીની વાત સાથે સહમતિ દર્શાવી જણાવ્યું હતું કે મોટા શહેરોમાં જીવનશૈલી ખરેખર અતિશય ખર્ચાળ બની ગઈ છે અને મર્યાદિત પગારમાં ગુજારાન ચલાવવું અત્યંત મુશ્કેલ છે. જ્યારે અન્ય કેટલાક લોકોનું માનવું છે કે યોગ્ય નાણાકીય આયોજન, સંયમિત જીવન અને શહેરના છેવાડાના વિસ્તારોમાં રહેવાથી ઓછા ખર્ચમાં પણ સુખી જીવન જીવી શકાય છે અને એક લાખ રૂપિયાની મર્યાદા વાસ્તવિક નથી.
આ સમગ્ર વિવાદ ભારતના મહાનગરોમાં ઝડપથી વધી રહેલા રહેણીકરણીના ખર્ચ અને સામાન્ય નાગરિકોની આર્થિક પરિસ્થિતિ પર ગંભીર સવાલો ઊભા કરે છે. કારકિર્દી બનાવવા અને સપના પૂરા કરવા માટે પોતાના વતન છોડીને મોટા શહેરોમાં આવતા યુવાનો માટે આસમાની મોંઘવારી હવે એક સૌથી મોટો પડકાર સાબિત થઈ રહી છે.
