અમેરિકાના ડેન્વર શહેરમાં એક ચોંકાવનારી ઘટના સામે આવી છે, જ્યાં ૨૬ વર્ષની લાંબી સેવા ધરાવતી વરિષ્ઠ પોલીસ ડિટેક્ટિવ જેમી મેજર નશામાં ધૂત થઈને ગાડી ચલાવતી વખતે વિવાદમાં સપડાઈ છે. હોલી હિલ્સ વિસ્તારમાં રાત્રે બનેલી આ ઘટનામાં, તેણે ડેન્વર સિટી દ્વારા ફાળવવામાં આવેલી અનમાર્ક્ડ પોલીસ એસયુવીથી એક પાર્ક કરેલી કારને ટક્કર મારી હતી અને ઘટનાસ્થળેથી ફરાર થઈ ગઈ હતી. આ અકસ્માત એટલો જોરદાર હતો કે તેનો અવાજ સાંભળીને આસપાસના પડોશીઓ બહાર આવી ગયા હતા અને એક રિંગ કેમેરામાં પણ ગાડી ભાગતી નજરે પડી હતી. અકસ્માત બાદ ગાડીનું આગળનું જમણું ટાયર નીકળી ગયું હોવા છતાં તે માત્ર એક જ રિમ્મ પર ગાડી દોડાવતી રહી હતી, જેને રોકવા માટે એક સતર્ક નાગરિકે પોતાની કારથી તેનો પીછો પણ કર્યો હતો.
પરિસ્થિતિની ગંભીરતાને ધ્યાનમાં રાખીને અરાપાહો કાઉન્ટીના ડેપ્યુટીઓએ એક માર્ગ પર 'પિંચ' મેન્યુવરનો ઉપયોગ કરીને આ ક્ષતિગ્રસ્ત એસયુવીને અટકાવી હતી. વાહન ચોરાયું હોવાની શંકાના આધારે અધિકારીઓએ સર્વિસ વેપન્સ તાણીને ડ્રાઇવરને બંદૂકની અણીએ બહાર કાઢી હતી, ત્યારે તેની ઓળખ જેમી મેજર તરીકે થઈ હતી. ગાડીમાંથી દારૂની ભરેલી બોટલ મળી આવી હતી અને ડ્રાઇવરની હાલત જોઈને સ્પષ્ટ થયું હતું કે તેણે ભારે નશો કર્યો હતો. ગાડીની બહાર નીકળેલી આ મહિલા અધિકારીએ યુનિફોર્મ પહેર્યો ન હતો અને માત્ર એક સેન્ડલ પહેરેલી હાલતમાં પોતાની ઓળખ પોલીસ ડિટેક્ટિવ તરીકે આપી હતી, જેણે કાયદાના રક્ષક થઈને જ કાયદાના ધજાગરા ઉડાવ્યા હતા.
આ ગંભીર ઘટના બાદ ડેન્વર પોલીસ વિભાગે ત્વરિત કાર્યવાહી કરીને તેને ડિમોટ કરી હતી અને આંતરિક તપાસ દરમિયાન જ તેણે ૨ જી નવેમ્બરે પોતાના પદ પરથી રાજીનામું આપી દીધું હતું. તેની સામે ડ્રંક એન્ડ ડ્રાઇવ, અકસ્માત સ્થળેથી નાસી છૂટવું, અકસ્માતની જાણ ન કરવી અને બેદરકારીથી વાહન ચલાવવા સહિતના અનેક ગંભીર આરોપો હેઠળ ગુનો નોંધવામાં આવ્યો છે. આ મામલે આગામી ૧૪ ડિસેમ્બરે કોર્ટમાં સુનાવણી હાથ ધરવામાં આવશે. બીજી તરફ, આ ઘટનાથી સ્થાનિક નાગરિકોમાં ભારે રોષ જોવા મળી રહ્યો છે અને લોકો સવાલ ઉઠાવી રહ્યા છે કે જો કાયદો લાગુ કરનારા જ ખુલ્લેઆમ નિયમો તોડશે, તો સામાન્ય નાગરિકોની સુરક્ષાનું શું થશે.
