JAMNAGAR 361005 GUJARAT, INDIA
મુખ્ય પાના પર પાછા જાઓ
JAMNAGAR MIRROR
ગુજરાત

પીએમ-સ્વનિધિ યોજનાના અમલીકરણમાં અમદાવાદ મનપાની રાષ્ટ્રીય સિદ્ધિ, સમગ્ર દેશમાં મેળવ્યો દ્વિતીય ક્રમ

પીએમ-સ્વનિધિ યોજનાના અમલીકરણમાં અમદાવાદ મનપાની રાષ્ટ્રીય સિદ્ધિ, સમગ્ર દેશમાં મેળવ્યો દ્વિતીય ક્રમ
અમદાવાદ મહાનગરપાલિકાએ 'પીએમ-સ્વનિધિ યોજના'ના ઉત્કૃષ્ટ અને પારદર્શક અમલીકરણ દ્વારા રાષ્ટ્રીય સ્તરે દ્વિતીય ક્રમ મેળવીને સમગ્ર રાજ્યનું ગૌરવ વધાર્યું છે, જેના ભાગરૂપે દિલ્હી ખાતે મનપાના પ્રતિનિધિઓને પ્રતિષ્ઠિત એવોર્ડ અર્પણ કરવામાં આવ્યો હતો.

અમદાવાદ શહેરે સ્વચ્છતા સર્વેક્ષણમાં રાષ્ટ્રીય સ્તરે મેળવેલી સફળતા બાદ હવે વધુ એક ગૌરવવંતું સીમાચિહ્ન સર કર્યું છે. કેન્દ્ર સરકારની મહત્વાકાંક્ષી 'પીએમ-સ્વનિધિ યોજના'ના ઉત્કૃષ્ટ અમલીકરણમાં અમદાવાદ મહાનગરપાલિકાએ સમગ્ર દેશમાં ડંકો વગાડ્યો છે. દેશની રાજધાની નવી દિલ્હી ખાતે યોજાયેલા એક ભવ્ય અને ગરિમાપૂર્ણ સમારોહમાં કેન્દ્રીય આવાસ અને શહેરી બાબતોના મંત્રી મનોહર લાલના હસ્તે અમદાવાદ મહાનગરપાલિકાના પ્રતિનિધિઓને આ રાષ્ટ્રીય એવોર્ડ અર્પણ કરવામાં આવ્યો હતો, જે શહેર માટે અત્યંત ગર્વની ક્ષણ છે.

આ સિદ્ધિ વિશે વિગતવાર વાત કરીએ તો, અર્બન લોકલ બોડી (ULB) શ્રેણી અંતર્ગત દેશભરના શહેરો વચ્ચે સ્પર્ધા યોજાઈ હતી, જેમાં ઉત્કૃષ્ટ પ્રદર્શન દાખવીને અમદાવાદ મનપાએ દ્વિતીય ક્રમ હાંસલ કર્યો છે. આ ભવ્ય સફળતા પાછળનું મુખ્ય કારણ એ છે કે, શહેરમાં અંદાજે 2.29 લાખ જેટલા શ્રમજીવી અને જરૂરિયાતમંદ શેરી ફેરિયાઓ (સ્ટ્રીટ વેન્ડર્સ) સુધી આ યોજનાનો પ્રત્યક્ષ અને પારદર્શક લાભ પહોંચાડવામાં આવ્યો છે. સમગ્ર દેશમાં સૌથી વધુ શેરી ફેરિયાઓને આ યોજનાનો નાણાકીય અને આર્થિક લાભ અપાવવામાં અમદાવાદ અગ્રેસર રહ્યું છે.

ઉલ્લેખનીય છે કે, કોવિડ-19 મહામારી બાદ દેશના નાના વેપારીઓ અને રેકડી-ગલ્લા ધારકોને આર્થિક રીતે બેઠા કરવા માટે કેન્દ્ર સરકાર દ્વારા આ યોજના શરૂ કરવામાં આવી હતી. આ યોજના અંતર્ગત ફેરિયાઓને વ્યાજ સહાય સાથે અત્યંત સરળતાથી ધિરાણ પૂરું પાડવામાં આવે છે. અમદાવાદ મહાનગરપાલિકા દ્વારા આ યોજનાના અમલીકરણ માટે ખાસ ઝુંબેશ ચલાવવામાં આવી હતી, જેના પરિણામે આજે લાખો શ્રમજીવી પરિવારો આત્મનિર્ભર બન્યા છે. મનપાની આ સરાહનીય કામગીરીને રાષ્ટ્રીય સ્તરે બિરદાવવામાં આવતા ગુજરાતનું નામ રોશન થયું છે.

ગુજરાત વિભાગના વધુ સમાચાર

LATEST ARTICLES