પંચમહાલ જિલ્લાના હાલોલ તાલુકામાં આવેલું અરાદ ગામ છેલ્લા કેટલાક વર્ષોથી ગલગોટાની ફૂલોની ખેતી માટે સમગ્ર વિસ્તારમાં જાણીતું બન્યું છે. અહીંના ખેડૂતોએ પરંપરાગત પાકો છોડીને પુષ્પકૃષિને અપનાવી હતી અને અગાઉના વર્ષોમાં દિવાળીના તહેવાર દરમિયાન લાખો રૂપિયાની કમાણી પણ કરી હતી. આ સિઝનમાં પણ ચોમાસા પછીના અનુકૂળ વાતાવરણને કારણે ગલગોટાનું વિપુલ પ્રમાણમાં ઉત્પાદન થયું છે. પરંતુ, જે મબલખ પાક ખેડૂતોના ઘરે ખુશીઓ લઈને આવવો જોઈએ, તે જ પાક આજે તેમની મોટી આર્થિક મુશ્કેલીનું કારણ બની ગયો છે. બજારમાં અચાનક ફૂલોનો જથ્થો ખૂબ વધી જતાં માંગ અને પુરવઠાનું સંતુલન બગડ્યું છે, જેના કારણે ખેડૂતોને ભારે નિરાશા સાંપડી છે.
ભૂતકાળમાં મધ્યપ્રદેશ, મહારાષ્ટ્ર અને ગુજરાતભરના વેપારીઓ અરાદ ગામે સીધા ખેતરે આવીને ગલગોટાના ફૂલોથી ગાડીઓ ભરી જતા હતા, જેના કારણે ખેડૂતોને પરિવહનની ચિંતા રહેતી ન હતી અને સારા ભાવ પણ મળતા હતા. પરંતુ આ વખતે સ્થિતિ બિલકુલ વિપરીત છે અને ખેડૂતોએ જાતે જ વાહનોમાં ફૂલો ભરીને બજારમાં જવું પડે છે, છતાં યોગ્ય ખરીદદારો મળતા નથી. એક સમયના ૮૦ થી ૧૦૦ રૂપિયા પ્રતિ કિલો વેચાતા ગલગોટાના ફૂલોના ભાવ ઘટીને માત્ર ૫ થી ૧૦ રૂપિયા પ્રતિ કિલો થઈ ગયા છે. પરિસ્થિતિ એવી સર્જાઈ છે કે ફૂલોની તોડણી, મજૂરી અને પરિવહનનો ખર્ચ પણ બહાર નીકળતો નથી, જેના કારણે ખેડૂતો વીઘા દીઠ ૫૦ થી ૭૦ હજાર રૂપિયા સુધીના આર્થિક નુકસાનનો સામનો કરી રહ્યા છે અને વેચાણ વગરના ફૂલો ખુલ્લા ખેતરોમાં ફેંકી દેવા મજબૂર બન્યા છે.
આ ગંભીર આર્થિક સંકટમાંથી બહાર આવવા માટે અરાદ ગામના ખેડૂતોએ સરકાર સમક્ષ કાયમી ઉકેલની માંગ ઉઠાવી છે. આ ક્ષેત્રમાં ફૂલોના મોટા પ્રમાણમાં થતા ઉત્પાદનને ધ્યાનમાં રાખીને અરાદ કે તેની આસપાસના વિસ્તારમાં જો વિશેષ APMC માર્કેટની સુવિધા ઊભી કરવામાં આવે, તો ખેડૂતોને સ્થાનિક સ્તરે જ યોગ્ય ખરીદદારો મળી શકે અને ભાવોનું યોગ્ય નિર્ધારણ થઈ શકે. ખેડૂતોએ આ વર્ષે થયેલા માતબર નુકસાન સામે સરકાર દ્વારા યોગ્ય આર્થિક સહાય કે વળતર ચૂકવવામાં આવે તેવી પણ પ્રબળ માંગ કરી છે, જેથી અન્નદાતા ફરીથી આત્મનિર્ભર બનીને આ વ્યવસાયમાં ટકી શકે.
