નાણા મંત્રાલયના અંદાજ વિભાગ દ્વારા જારી કરવામાં આવેલી નવી માર્ગદર્શિકા અનુસાર, કેન્દ્ર સરકારના લેવલ-૮ થી લેવલ-૧૧ અને તેનાથી ઉચ્ચ સ્તરના ગેઝેટેડ અધિકારીઓ સત્તાવાર કામકાજ માટે લેપટોપ, નોટબુક કે સમાન ઉપકરણો ખરીદી શકશે. નિયમિત ઉપકરણો માટે ૧.૫૦ લાખ રૂપિયા સુધીની મૂલ્ય મર્યાદા રાખવામાં આવી છે, જ્યારે ૪૦ ટકાથી વધુ 'મેક ઇન ઇન્ડિયા' કમ્પોનન્ટ ધરાવતા ડિવાઈસ માટે આ મર્યાદા વધારીને ૧.૮૦ લાખ રૂપિયા કરવામાં આવી છે. આ કિંમતોમાં સ્ટાન્ડર્ડ સોફ્ટવેરનો ખર્ચ પણ સામેલ છે, જે અધિકારીઓની તકનીકી જરૂરિયાતોને સરળ બનાવશે.
નવી નીતિ મુજબ, આ સુવિધા લેવલ-૮ થી ૧૧ ના ૭૫ ટકા અધિકારીઓ અને લેવલ-૧૨ કે તેથી ઉપરના તમામ અધિકારીઓ માટે લાગુ થશે. ખાસ વાત એ છે કે ખરીદીના ચાર વર્ષ પૂર્ણ થયા બાદ અધિકારીઓ આ ઉપકરણ પોતાની પાસે જ રાખી શકશે. જો કોઈ કર્મચારી ચાર વર્ષ પૂરા થાય તે પહેલાં નિવૃત્ત થાય અથવા નોકરી છોડે, તો તે સમયના બુક વેલ્યુ (ઘસારા બાદનું મૂલ્ય) જેટલી રકમ ચૂકવીને ઉપકરણ પોતાની પાસે જાળવી શકે છે. આ ઉપકરણો પર વાર્ષિક ૨૫ ટકાના દરે ઘસારો ગણવામાં આવશે, જેની સ્પષ્ટ ફોર્મ્યુલા પણ નક્કી કરવામાં આવી છે.
સરકારે સ્પષ્ટ કર્યું છે કે જો કોઈ અધિકારીની બદલી અન્ય મંત્રાલય કે પબ્લિક સેક્ટર અન્ડરટેકિંગ્સ (PSU) માં થાય, તો તેઓ આ ડિવાઈસ પોતાની સાથે લઈ જઈ શકશે. વળી, વોરંટી સમયગાળા પછીના જાળવણી અને મરામતનો ખર્ચ સંબંધિત વિભાગ દ્વારા જ ભોગવવામાં આવશે. જો ઉપકરણ રિપેર ન થઈ શકે તેવી સ્થિતિમાં પહોંચે, તો ચાર વર્ષ પહેલાં પણ નવું ઉપકરણ મેળવવાની જોગવાઈ છે. સુરક્ષા અને ડેટાની ગોપનીયતા જાળવવાની સંપૂર્ણ જવાબદારી સંબંધિત અધિકારીની રહેશે, જ્યારે લશ્કરી અને અર્ધલશ્કરી દળો માટે વિશેષ સુરક્ષા નિયમો લાગુ રહેશે.
