વૈશ્વિક સ્તરે પશ્ચિમ એશિયામાં ચાલી રહેલા તણાવ અને સંઘર્ષને કારણે ભારતની કન્ઝ્યુમર ગુડ્સ, ઓટોમોબાઇલ, પેઇન્ટ અને અન્ય ઉત્પાદન ક્ષેત્રની કંપનીઓ ગંભીર આર્થિક દબાણનો સામનો કરી રહી છે. ICRAના અહેવાલ મુજબ, આ સંઘર્ષને કારણે માત્ર ક્રૂડ ઓઇલ જ નહીં પરંતુ પેકેજિંગ મટિરિયલ્સ, પ્લાસ્ટિક, રબર, કેમિકલ્સ, બેઝિક મેટલ્સ અને ખાદ્ય તેલોના ભાવમાં પણ ભયજનક વધારો થયો છે. શિપિંગ રૂટ્સમાં અવરોધો સર્જાવાના કારણે કન્ટેનરના ભાડામાં પ્રી-ક્રાઈસિસ સ્તરથી ૩૦૦ ટકાથી વધુનો ઉછાળો આવ્યો છે અને યુદ્ધ-જોખમ સરચાર્જ પણ ઉમેરાયા છે. આ ઉપરાંત, રોડ ટ્રાન્સપોર્ટેશનના ખર્ચમાં પણ વધારો થતાં સપ્લાય ચેઈન અને માલસામાનની હેરફેર અત્યંત મોંઘી બની ગઈ છે, જેની સીધી અસર કોર્પોરેટ જગતના ઓપરેટિંગ ખર્ચ પર પડી રહી છે.
આ વધતા ખર્ચની ભરપાઈ કરવા માટે હિન્દુસ્તાન યુનિલિવર (HUL), એશિયન પેઇન્ટ્સ અને મારુતિ સુઝુકી જેવી અગ્રણી કંપનીઓએ તેમના ઉત્પાદનોના ભાવમાં સતત વધારો કર્યો છે. સપ્ટેમ્બર ક્વાર્ટરમાં HUL એ સરેરાશ ૭.૫ ટકા ભાવ વધારો કર્યો હોવા છતાં તેનું EBITDA માર્જિન આશરે ૨૦૦ બેસિસ પોઈન્ટ ઘટ્યું છે. એ જ રીતે, એશિયન પેઇન્ટ્સ અને મારુતિ સુઝુકીએ પણ ગ્રાહકોની માંગ અને બજારમાં વેચાણ જાળવી રાખવા માટે ખર્ચનો આખો બોજ ગ્રાહકો પર નાખવાને બદલે અંશતઃ પોતે જ ભોગવવાનું પસંદ કર્યું છે, જેના કારણે તેમના માર્જિન પર ભારે દબાણ જોવા મળ્યું છે. જો કે, આ મુશ્કેલ પરિસ્થિતિ વચ્ચે પણ નેસ્લે ઇન્ડિયા જેવી કેટલીક કંપનીઓએ ઉત્તમ વેચાણ વૃદ્ધિ નોંધાવી છે અને બ્રાન્ડ માર્કેટિંગ પાછળના રોકાણમાં વધારો કર્યો છે.
આવનારા સમયમાં નાણાકીય વર્ષ ૨૦૨૭ ના બીજાાર્ધમાં પણ કંપનીઓની નફાકારકતા તેમની રેવન્યુ વૃદ્ધિ કરતા પાછળ રહેવાની ધારણા છે. કાચા માલના ઊંચા ભાવ અને વૈશ્વિક અસ્થિરતાને કારણે કિંમતો અને ખર્ચ વચ્ચેનું અંતર પૂરવામાં સમય લાગી રહ્યો છે. જો કે, જેમ જેમ કંપનીઓ દ્વારા કરવામાં આવેલા ભાવ વધારાની અસર બજારમાં દેખાશે અને કોસ્ટ-કટીંગના પગલાં કારગર નીવડશે, તેમ ક્રમશઃ માર્જિનમાં સુધારો થવાની આશા છે. હાલની આર્થિક સ્થિતિમાં કંપનીઓ માટે ગ્રાહકોની માંગને જાળવી રાખીને મોંઘવારી સામે ટકી રહેવું એક મોટો પડકાર બની ગયો છે.
