સુરત શહેરના ભેસ્તાન આવાસ પાસે આવેલા સાઈ પવિત્ર રેસિડેન્સી કન્સ્ટ્રક્શન સાઈટ પર એક અત્યંત હૃદયદ્રાવક અને કાળજું કંપાવનારી દુર્ઘટના સામે આવી છે. મૂળ મધ્યપ્રદેશના વતની એવું એક શ્રમિક દંપતી પેટિયું રળવા માટે આ સાઈટ પર કડિયા કામ કરી રહ્યું હતું. તેમની બે વર્ષીય માસૂમ પુત્રી રક્ષા પવાર સાઈટના પરિસરમાં જ રમી રહી હતી. બાળકી પોતાની બાળસહજ રમતમાં મશગુલ હતી ત્યારે કોઈ અગમ્ય કારણોસર તે રમતા-રમતા બીજા માળની ખુલ્લી જગ્યા સુધી પહોંચી ગઈ હતી, જ્યાં અચાનક પગ લપસી જવાથી તે સીધી જ નીચે પટકાઈ હતી.
બાળકી થોડીવાર દેખાઈ નહીં ત્યારે તેના પિતાએ આસપાસના વિસ્તારમાં તેની શોધખોળ શરૂ કરી હતી. પિતાએ જ્યારે નીચે નજર નાખી ત્યારે તેમની નજર ગંભીર રીતે ઘાયલ થયેલી અને લોહીથી લથપથ પડેલી પોતાની માસૂમ દીકરી પર પડી હતી, જેને જોઈને માતા-પિતાના પગ નીચેથી જમીન સરકી ગઈ હતી. આકસ્મિક રીતે બનેલી આ ઘટના બાદ તાત્કાલિક ધોરણે લોહીથી લથપથ માસૂમ રક્ષાને સારવાર અર્થે સુરતની સરકારી સિવિલ હોસ્પિટલ ખાતે ખસેડવામાં આવી હતી. જોકે, હોસ્પિટલમાં ટૂંકી સારવાર દરમિયાન જ માસૂમ રક્ષાએ પોતાના પ્રાણ છોડી દીધા હતા અને ફરજ પરના તબીબોએ તેને મૃત જાહેર કરી હતી.
આ અણધારી અને ગોઝારી દુર્ઘટનાના ભોગ બનેલો પરિવાર માત્ર દસ દિવસ અગાઉ જ મધ્યપ્રદેશથી સુરત રોજીરોટી મેળવવા માટે આવ્યો હતો. પરિવારમાં માતા-પિતા અને આ એકમાત્ર લાડકી દીકરી જ હતી, જેના અકાળે અવસાનથી પરિવારના તમામ સપનાઓ રોળાઈ ગયા છે અને માતા-પિતા પર જાણે આભ ફાટી પડ્યું હોય તેવી કરુણ સ્થિતિ સર્જાઈ છે. માસૂમ દીકરીના મૃત્યુથી સમગ્ર શ્રમિક પરિવાર અને સ્થાનિક લોકો શોકમાં ડૂબી ગયા છે, સાથે જ આ ઘટના કન્સ્ટ્રક્શન સાઈટો પર કામ કરતા શ્રમિકોના બાળકોની સલામતી અને સુરક્ષા સામે પણ ગંભીર સવાલો ઊભા કરે છે.
