સુરત મહાનગરપાલિકાના એફોર્ડેબલ હાઉસિંગ વિભાગ દ્વારા નાસીરનગર ડિમોલિશન મામલે એક મહત્વનો અને વિવાદાસ્પદ નિર્ણય લેવામાં આવ્યો છે, જેમાં અસરગ્રસ્ત પરિવારોને કોઈપણ પ્રકારનું વૈકલ્પિક આવાસ નહીં આપવાની સ્પષ્ટ દરખાસ્ત રજૂ કરાઈ હતી. મનપાએ એવો તર્ક આપ્યો છે કે જાહેર જમીન પરના દબાણના કિસ્સામાં આવાસ નીતિ લાગુ થઈ શકતી નથી, જેને સ્ટેન્ડિંગ કમિટી દ્વારા મંજૂર પણ કરી દેવાઈ છે. જોકે, આ દરખાસ્ત પાછળ કોઈ જ યોગ્ય અભ્યાસ કરવામાં આવ્યો નથી અને બિલ્ડરો તેમજ મનપાના જવાબદાર અધિકારીઓને બચાવવા માટેનો સુવ્યવસ્થિત પ્રયાસ થઈ રહ્યો છે તેવો ગંભીર આક્ષેપ અસરગ્રસ્તો દ્વારા કરવામાં આવી રહ્યો છે.
મનપાના આ અણધડ વલણને કારણે છેલ્લા પાંચ મહિનાથી પાલિકાના હોલમાં આશરો લઈને બેઠેલા અસંખ્ય પરિવારોની સ્થિતિ અત્યંત દયનીય બની ગઈ છે. શરૂઆતમાં તંત્ર દ્વારા એવી મૌખિક ખાતરી આપવામાં આવી હતી કે જ્યાં સુધી વૈકલ્પિક વ્યવસ્થા ન થાય ત્યાં સુધી તેમને તમામ જરૂરી સગવડો પૂરી પાડવામાં આવશે, પરંતુ વાસ્તવિકતા એ છે કે છેલ્લા ચાર મહિનાથી આ પરિવારોને પૂરતું જમવાનું કે પીવાનું પાણી સુદ્ધાં મળતું નથી. અગાઉ કરેલા વાયદાઓથી પાલિકા હવે ફરી ગઈ છે અને વૈકલ્પિક વ્યવસ્થા માટે સ્પષ્ટ ના પાડી રહી છે, જેના કારણે આ ગરીબ પરિવારો બેહાલ અને નિરાધાર સ્થિતિમાં જીવન વિતાવી રહ્યા છે.
અસરગ્રસ્તોએ તંત્રની આ કામગીરી સામે અણીયારા સવાલો ઉઠાવતા રોષ વ્યક્ત કર્યો છે કે જો તેઓ વર્ષોથી આ સરકારી જમીન પર રહેતા હતા, તો તંત્ર દ્વારા તેમને લાઈટબિલ, વેરાબિલ અને રોડ-રસ્તા જેવી સુવિધાઓ કેમ આપવામાં આવી હતી અને જો જગ્યા ગેરકાયદેસર જ હતી તો અગાઉથી જ દબાણો કેમ દૂર ન કરાયા? પાલિકા પોતાને કાયદા અને અદાલત કરતાં પણ મોટી સમજી રહી હોવાનો આક્ષેપ કરીને અસરગ્રસ્તો હવે આ લડાઈને ગુજરાત હાઇકોર્ટ સમક્ષ લઈ જવાની તૈયારી કરી રહ્યા છે, જેથી આ મામલે આગામી દિવસોમાં નવો કાનૂની વિવાદ સર્જાય તેવી પૂરી સંભાવના છે.
