પાંચ મેચોની વન-ડે શ્રેણીમાં શાનદાર પ્રદર્શન કરી રહેલા ભારતીય ફાસ્ટ બોલર ઓકિબ નબીએ ન્યૂઝીલેન્ડના મુશ્કેલ હવામાન અને પરિસ્થિતિઓ સાથે તાલમેલ સાધવા અંગે ખુલીને વાત કરી છે. માઉન્ટ મૌંગાનુઈના બે ઓવલ ખાતે રમાનારી ચોથી મેચ પહેલા પ્રેસ કોન્ફરન્સમાં બોલતા 'બારામુલ્લા એક્સપ્રેસ' તરીકે જાણીતા આ બોલરે કહ્યું કે માત્ર ઝડપ હોવી પૂરતી નથી, પરંતુ મેદાન પર તમારી કુશળતા જ કામ લાગે છે. ન્યૂઝીલેન્ડની ઓછી પરિચિત પિચો પર તેણે સ્વીકાર્યું કે સ્વિંગ કરતાં સીમ મૂવમેન્ટનો યોગ્ય ઉપયોગ કરવો ખૂબ જરૂરી છે, કારણ કે બેટ્સમેનો સરળતાથી સ્વિંગનો સામનો કરી લેતા હોય છે. પ્રથમ મેચમાં કોઈ વિકેટ ન મળ્યા બાદ બીજી વન-ડેમાં વિલ યંગ અને ટિમ સીફર્ટને આઉટ કરીને કમબેક કરનાર નબીએ સ્પષ્ટ કર્યું કે તે ઘરેલુ ક્રિકેટની સફળ પદ્ધતિઓને જ અહીં પણ જાળવી રાખશે.
ઘરેલુ ક્રિકેટમાં લાંબી મહેનત અને શાનદાર દેખાવના જોરે ભારતીય ટીમ સુધીની સફર ખેડનાર ઓકિબ નબીએ રણજી ટ્રોફીની યાદો તાજી કરી હતી. વર્ષ ૨૦૨૪-૨૫ અને ૨૦૨૫-૨૬ની રણજી સિઝનમાં કુલ ૧૦૪ વિકેટ ઝડપનાર આ યુવા ખેલાડીએ ૨૦૨૫-૨૬માં ૧૭ ઇનિંગ્સમાં ૧૨.૬૫ની શાનદાર એવરેજથી ૬૦ વિકેટ ખેરવીને જમ્મુ-કાશ્મીરને પહેલીવાર રણજી ચેમ્પિયન બનાવવામાં મહત્ત્વની ભૂમિકા ભજવી હતી અને 'પ્લેયર ઓફ ધ ટૂર્નામેન્ટ' બન્યા હતા. નબીએ સ્વીકાર્યું કે વ્હાઇટ-બોલ ક્રિકેટમાં તક મળતા પહેલા તે રેડ-બોલ એટલે કે ટેસ્ટ ટીમમાં કૉલની અપેક્ષા રાખી રહ્યો હતો, પરંતુ વાઇટ-બોલ ક્રિકેટનો આ અનુભવ પણ ભવિષ્યમાં તેની ટેસ્ટ કારકિર્દી માટે અત્યંત ઉપયોગી સાબિત થશે તેમ તે માને છે.
પાંચ મેચોની આ વન-ડે શ્રેણીમાં હાલ ટીમ ઇન્ડિયા ૨-૦ ની સરસાઈ ધરાવે છે, કારણ કે હેમલ્ટનની ત્રીજી મેચ વરસાદના કારણે રદ્દ થઈ હતી. શ્રેણીની ચોથી મેચ પહેલા નબીએ પીચોની પ્રકૃતિ વિશે વાત કરતા જણાવ્યું કે ડ્રોપ-ઇન પિચો પર ઝડપી બોલરો અર્શદીપ સિંહ અને અંશુલ સાથે સતત રણનીતિઓની ચર્ચા થતી રહે છે. ફ્લેટ અને સારી બેટિંગ પિચો પર રન નિયંત્રિત કરવા માટે શિસ્તબદ્ધ બોલિંગ અત્યંત અનિવાર્ય છે. કાશ્મીરના હવામાં અને અહીંના વાતાવરણમાં સમાનતા હોવા છતાં વિરોધી ટીમ અને ક્રિકેટનું સ્તર અલગ હોવાનો અનુભવ તેણે શેર કર્યો હતો અને દેશ માટે રમવું એ પોતાના માટે ગર્વની ક્ષણ હોવાનું જણાવ્યું હતું.
