અમેરિકાના વોશિંગ્ટન રાજ્યમાં મિલકતના માલિકી હકને લઈને એક ખૂબ જ રસપ્રદ અને કાનૂની દૃષ્ટિએ મહત્ત્વનો કિસ્સો સામે આવ્યો છે. અહીંના ટુકવિલા વિસ્તારમાં જેક લાયન્સ અને તેમની દિવંગત પત્ની લિયોટા લાયન્સે નવેમ્બર ૨૦૦૧માં એક મકાન ખરીદ્યું હતું. વર્ષ ૨૦૧૧માં લિયોટાના ભત્રીજા કર્ટીસ રીપે આ ઘરમાં પ્રવેશ કર્યો અને કોઈપણ પ્રકારના ભાડા કરાર વિના કે ભાડું ચૂકવ્યા વગર આશરે ૧૪ વર્ષ સુધી ત્યાં નિવાસ કર્યો હતો. આ લાંબા સમયગાળા દરમિયાન કર્ટીસે ઘરનું રંગરોગાન, બગીચાની જાળવણી, સફાઈ અને પેવ્ડ પાર્કિંગ પાથ બનાવવા જેવા વિવિધ સુધારણાના કાર્યો કર્યા હતા તેમજ ક્યારેક વીજળી અને પાણીના બિલ પણ ચૂકવ્યા હતા.
જાન્યુઆરી ૨૦૨૫માં લિયોટાના અવસાન બાદ તેમની વસિયતનામું મુજબ મિલકતનો હિસ્સો જેક લાયન્સના નામે સ્થાનાંતરિત કરવામાં આવ્યો હતો. જેકે કર્ટીસને ઘર ખાલી કરવા જણાવ્યું પરંતુ તેણે ઇનકાર કરી દીધો, જેથી મામલો કોર્ટમાં પહોંચ્યો હતો. કિંગ કાઉન્ટી સુપીરિયર કોર્ટમાં સ્વ-પ્રતિનિધિત્વ કરતા કર્ટીસે 'એડવર્સ પઝેશન' (એટલે કે લાંબા સમયના કબજાના આધારે માલિકી હક) હેઠળ કાઉન્ટર ક્લેમ દાખલ કર્યો હતો. નીચલી કોર્ટે જેકની તરફેણમાં ચુકાદો આપીને ભત્રીજાને મિલકત ખાલી કરવાનો આદેશ આપ્યો હતો, જેની સામે કર્ટીસે અપીલ કોર્ટમાં પડકાર ફેંક્યો હતો.
વોશિંગ્ટન કોર્ટ ઓફ અપીલ્સે નીચલી કોર્ટના ચુકાદાને યથાવત રાખતા સ્પષ્ટ કર્યું કે જો કોઈ વ્યક્તિ શરૂઆતમાં મિલકત માલિકોની પરવાનગીથી રહી હોય, તો માત્ર જાળવણી કરવા કે સુધારા કરવાથી તે માલિકી હક દાવો કરી શકતી નથી. કોર્ટે નોંધ્યું કે મિલકત વૈવાહિક સમુદાયની હોવાથી બંને માલિકોની સંમતિ જરૂરી હતી, અને અહીં બંને તરફથી પરવાનગી પાછી ખેંચી લેવાયાના પૂરતા પુરાવા નહોતા. આ ચુકાદાએ કાયદાકીય રીતે સ્પષ્ટ કરી દીધું છે કે સંબંધીના ઘરમાં મફત રહેવું અને તેની માવજત કરવી એ આપોઆપ માલિકી અધિકાર નથી અપાવતું.
