બુધવારના રોજ મધ્ય પૂર્વમાં તણાવ વધુ ઘેરો બન્યો જ્યારે સાઉદી અરેબિયાની સૈન્ય ગઠબંધન સેનાએ યમનના ઇરાન સમર્થિત હૂતી વિદ્રોહીઓ દ્વારા કરવામાં આવેલા મોટા હવાઈ હુમલાઓને નિષ્ફળ બનાવ્યા હતા. સાઉદી રક્ષા પ્રણાલીએ રિયાધ તરફ જતી ત્રણ ક્રૂઝ મિસાઇલો, મક્કા અને દક્ષિણી વિસ્તારોને નિશાન બનાવતા બે ડ્રોન તેમજ પશ્ચિમ તરફ તાકેલી બે મિસાઇલોને આકાશમાં જ શોધીને નષ્ટ કરી દીધી હતી. છેલ્લા કેટલાક દિવસોથી સાઉદી રાજધાની અને અન્ય શહેરો પર હૂતી જૂથ દ્વારા હુમલાઓની સંખ્યામાં નોંધપાત્ર વધારો થયો છે, જેના જવાબમાં સાઉદી સેના દ્વારા પણ કડક કાર્યવાહી કરવામાં આવી રહી છે.
આ હુમલાઓ બાદ વિશ્વભરના મુસ્લિમો માટે અત્યંત પવિત્ર એવા મક્કા શહેરને લઈને ભારે ચિંતા ફેલાઈ હતી, કારણ કે આ શહેર વાર્ષિક હજ યાત્રાનું મુખ્ય કેન્દ્ર છે. જો કે, હૂતી જૂથના લશ્કરી પ્રવક્તા યાહ્યા સારેએ સ્પષ્ટતા કરતા જણાવ્યું હતું કે તેમનું જૂથ ક્યારેય મક્કાને નિશાન નથી બનાવતું અને તેમના ઓપરેશન્સનો મુખ્ય ઉદ્દેશ્ય માત્ર તેલ સુવિધાઓ તેમજ લશ્કરી મથકો પર હુમલો કરવાનો હોય છે. આ સાથે જ સારેએ સાઉદી અરેબિયાના મહત્વપૂર્ણ ઓઇલ હબ યાનબુ ખાતે આવેલા પંપિંગ સ્ટેશનને પણ નિશાન બનાવવાનો દાવો કર્યો હતો, જો કે સાઉદી સત્તાવાળાઓ દ્વારા આ અંગે કોઈ સત્તાવાર પુષ્ટિ કરવામાં આવી નથી.
ગયા મહિનાથી સાઉદી અરેબિયા અને હૂતી વિદ્રોહીઓ વચ્ચે સક્રિય થયેલું આ સશસ્ત્ર સંઘર્ષ હવે ચરમસીમા પર પહોંચી ગયું છે. વ્યૂહાત્મક રીતે મહત્વપૂર્ણ લાલ સમુદ્રના પ્રવેશદ્વાર બાબ અલ-મંદેબ સ્ટ્રેટ પાસે હૂતીઓની પ્રવૃત્તિઓ વધ્યા બાદ બંને પક્ષો વચ્ચે હવાઈ હુમલાઓ તેજ બન્યા છે. સાઉદી સિવિલ ડિફેન્સે તાએફ, યાનબુ અને ખામીસ મુશૈત જેવા શહેરોમાં નાગરિકોને સાવચેત રહેવાની ચેતવણી આપી હતી, જે બાદ ખતરો ટળી ગયો હોવાનું જાહેર કરવામાં આવ્યું હતું. અગાઉ થયેલા હુમલાઓમાં અરામકોની બિલ્ડિંગ અને એરપોર્ટને નુકસાન થયું હોવાથી સુરક્ષા વ્યવસ્થા અત્યંત સઘન કરી દેવામાં આવી છે.
