તમિલનાડુમાં ઓટોમોબાઈલ સેક્ટરના વિકાસને વધુ વેગ આપતા, અગ્રણી હ્યુન્ડાઈ સપ્લાયર્સ - હ્વાશિન ઓટોમોટિવ ઇન્ડિયા અને સેયોને ઇ-હ્વા સમિટ ઓટોમોટિવ ઇન્ડિયાએ આગામી પાંચ વર્ષ દરમિયાન કુલ રૂ. ૧,૩૭૦ કરોડના તાજા રોકાણની જાહેરાત કરી છે. સોશિયલ મીડિયા પર તમિલનાડુના પ્રોજેક્ટ્સ અન્યત્ર ખસી રહ્યા હોવાની અફવાઓ વચ્ચે આવેલા આ પ્રસ્તાવોએ રાજ્ય સરકારની મજબૂત ઔદ્યોગિક નીતિઓ અને રોકાણકારોના અડગ વિશ્વાસ પર મહોર મારી દીધી છે. આ બંને કંપનીઓએ સચિવાલય ખાતે ઉદ્યોગ મંત્રી સમક્ષ તેમના ઇરાદાપત્ર (Letter of Intent) સત્તાવાર રીતે રજૂ કર્યા હતા, જેને રાજ્ય સરકારે ખુલ્લા દિલથી આવકાર્યા છે.
વિવિધ ઓઇએમ (OEMs) અને હ્યુન્ડાઈને લાંબા સમયથી ઓટો પાર્ટ્સ પૂરા પાડતી હ્વાશિન ઓટોમોટિવ ઇન્ડિયા દ્વારા રિસર્ચ એન્ડ ડેવલપમેન્ટ (R&D), અદ્યતન મેન્યુફેક્ચરિંગ ટેકનોલોજી, સ્થાનિકીકરણ અને કૌશલ્ય વિકાસ પાછળ રૂ. ૮૫૦ કરોડનું રોકાણ કરવામાં આવશે. કંપની વર્ષ ૨૦૦૨થી તમિલનાડુમાં ઇરુંગાટ્ટુકો્ટાઈ સ્થિત એસઆઈપીસીઓટી (SIPCOT) ઇન્ડસ્ટ્રિયલ પાર્ક ખાતે સફળતાપૂર્વક કાર્યરત છે. જ્યારે બીજી તરફ, કાંચીપુરમ અને ચેંગલપટ્ટુ જિલ્લાઓમાં ઓપરેશન્સ ધરાવતી સેયોન ઇ-હ્વા સમિટ ઓટોમોટિવ દ્વારા ટેકનોલોજી વિકાસ, આધુનિકીકરણ અને નવા બિઝનેસ પ્રોજેક્ટ્સ પાછળ રૂ. ૫૨૦ કરોડનું રોકાણ પ્રસ્તાવિત કરવામાં આવ્યું છે, જે રાજ્યના ઓટો સેક્ટરને વૈશ્વિક સ્તરે વધુ મજબૂત બનાવશે.
આ મામલે રાજ્ય સરકાર સ્પષ્ટ કર્યું છે કે તેઓ સ્પર્ધાને આવકારે છે અને વિકાસની આ ગતિને જરાય મંદ પડવા દેશે નહીં. હ્યુન્ડાઈ મોટર ઇન્ડિયા દ્વારા અગાઉ જાહેર કરાયેલા રોકાણ કાર્યક્રમ અંતર્ગત વર્ષ ૨૦૩૨ સુધીમાં તમિલનાડુમાં રૂ. ૨૬,૦૦૦ કરોડથી વધુનું રોકાણ કરવાનું વચન આપવામાં આવ્યું છે, જે આગામી પાંચથી છ વર્ષમાં સ્થાનિક સ્તરે પ્રોક્યોરમેન્ટ અને મેન્યુફેક્ચરિંગનું પ્રમાણ મોટા પાયે વધારશે. ઉદ્યોગ જગતની આ હિલચાલ સાબિત કરે છે કે તમિલનાડુ માત્ર ઓટોમોબાઈલ હબ જ નથી, પરંતુ વૈશ્વિક રોકાણકારો માટે સૌથી પસંદગીનું અને ભરોસાપાત્ર ગંતવ્ય સ્થાન બની ગયું છે.
