દેશમાં મહિલાઓની સુરક્ષાને લઈને વારંવાર ઉઠતા સવાલો વચ્ચે વધુ એક શરમજનક કિસ્સો પ્રકાશમાં આવ્યો છે. કર્ણાટકની આ ઘટનામાં એક મહિલાએ 'રેપિડો' એપ દ્વારા બાઈક ટેક્સી બુક કરી હતી. પીડિત મહિલા જ્યારે પિકઅપ લોકેશન બાબતે વાત કરવા માટે ડ્રાઈવરને ફોન કર્યો, ત્યારે ડ્રાઈવરે વ્યાવસાયિક મર્યાદાઓ ઓળંગીને તેની સાથે અત્યંત વાંધાજનક અને જાતીય અર્થ ધરાવતી ભાષામાં વાતચીત શરૂ કરી દીધી હતી. આ અણધારી અને ડરામણી અનુભવીને કારણે મહિલા હચમચી ગઈ હતી અને તેણે સમગ્ર ઘટનાની વિગતો આપતો એક વીડિયો સોશિયલ મીડિયા પર વાયરલ કર્યો હતો, જેણે દેશભરના નેટીઝન્સનું ધ્યાન ખેંચ્યું હતું.
વાયરલ થયેલા ઓડિયો રેકોર્ડિંગમાં સ્પષ્ટ સાંભળવા મળે છે કે મહિલા ડ્રાઈવરને પૂછે છે કે તે લોકેશન પર પહોંચ્યા વગર કેમ ચાલ્યો ગયો, જેના જવાબમાં આરોપી ડ્રાઈવરે બેધડકપણે સ્થાનિક ભાષામાં અશોભનીય પ્રશ્ન કર્યો હતો. આ ઘટનાથી ડાઈવિંગ પ્લેટફોર્મ પર મુસાફરી કરતી મહિલાઓની સુરક્ષા સામે મોટો પ્રશ્નાર્થ ચિહ્ન ઊભો થયો છે. જોકે, વિવાદ વણસતો જોઈને આરોપી ડ્રાઈવરે પાછળથી મહિલાનો સંપર્ક સાધીને પોતાની આ હરકત બદલ માફી પણ માંગી હતી, પરંતુ સોશિયલ મીડિયા પર આ વીડિયો વાયરલ થતાં જ જનતામાં ભારે રોષ જોવા મળ્યો હતો અને કડક કાર્યવાહીની માંગ ઉઠી હતી.
આ મામલો સોશિયલ મીડિયા પર વાયરલ થયા બાદ કેબ એગ્રીગેટર કંપની 'રેપિડો' દ્વારા ત્વરિત અને સખત પગલાં લેવામાં આવ્યા છે. કંપનીએ સત્તાવાર નિવેદન જારી કરીને આ ઘટના પર ઊંડો અસંતોષ અને ખેદ વ્યક્ત કર્યો હતો. કંપનીએ જણાવ્યું કે મુસાફરો, ખાસ કરીને મહિલાઓની સલામતી, મર્યાદા અને સન્માન તેમની સર્વોચ્ચ પ્રાથમિકતા છે અને ગેરવર્તણૂક સામે તેમની 'ઝીરો ટાલરન્સ' નીતિ છે. આ ઘટનાની સત્યતા ચકાસીને કંપનીએ તાત્કાલિક ધોરણે સંબંધિત ડ્રાઈવરને પોતાના પ્લેટફોર્મ પરથી કાયમી ધોરણે હટાવી દીધો છે અને ભવિષ્યમાં આવી ઘટનાઓ ન પુનરાવર્તાય તે માટે કડક સુરક્ષા ધોરણો અપનાવવાની ખાતરી આપી છે.
