નવી મુંબઈના વ્યસ્ત કલંબોલી વિસ્તારમાં પોલીસ દ્વારા નિયમિત વાહન તપાસ (રૂટિન વ્હીકલ ઇન્સ્પેક્શન) હાથ ધરવામાં આવી હતી. આ દરમિયાન પોલીસ કર્મચારીઓએ એક શંકાસ્પદ સ્વિફ્ટ ડિઝાયર કારને રોકવાનો ઇશારો કર્યો હતો. સીસીટીવી ફૂટેજમાં સ્પષ્ટ જોઈ શકાય છે કે કાર ચાલકે પહેલા ગાડી થોભાવી હતી, પરંતુ જેવો પોલીસ કોન્સ્ટેબલ દિલીપ ભોઈર ગાડીની સામે આવ્યા કે તરત જ ચાલકે ગાડી રોકવાને બદલે તેમના પર ચડાવી દીધી હતી. અચાનક થયેલી આ ટક્કરને કારણે કોન્સ્ટેબલ દિલીપ ભોઈર ફંગોળાઈને કારના બોનેટ પર જઈને પડ્યા હતા.
ગાડીના બોનેટ પર પોલીસકર્મી હોવા છતાં નિર્દય ચાલકે વાહન થોભાવ્યું નહોતું અને લગભગ ૨૦૦ મીટર સુધી તે જ સ્થિતિમાં કાર ભગાવી મૂકી હતી. આ સમગ્ર રોમાંચક અને રુંવાડા પડાડી દેતી ઘટના નજીકમાં લાગેલા સીસીટીવી કેમેરામાં કેદ થઈ ગઈ હતી, જે હાલ સોશિયલ મીડિયા પર ભારે વાયરલ થઈ રહી છે. આ ગંભીર અકસ્માતમાં ઈજાગ્રસ્ત થયેલા પોલીસ કોન્સ્ટેબલ દિલીપ ભોઈરને તાત્કાલિક ધોરણે નજીકની હોસ્પિટલમાં ખસેડવામાં આવ્યા છે, જ્યાં તેમની સારવાર ચાલી રહી છે. ઘટનાને અંજામ આપ્યા બાદ કારમાં સવાર બંને શખ્સો વાહન સાથે ઘટનાસ્થળેથી ફરાર થઈ જવામાં સફળ રહ્યા હતા.
આ ઘટના બાદ હરકતમાં આવેલી પોલીસે તપાસ શરૂ કરતા ચોંકાવનારો ખુલાસો થયો છે કે કાર પર લગાવવામાં આવેલી નંબર પ્લેટ તદ્દન બનાવટી (ફેક) હતી. નકલી નંબર પ્લેટ હોવાને કારણે આરોપીઓ અને તે વાહનને શોધી કાઢવું પોલીસ માટે એક મોટો પડકાર બની ગયો છે. હાલ પોલીસ આસપાસના વિસ્તારોના તમામ સીસીટીવી ફૂટેજના આધારે આરોપીઓની સઘન શોધખોળ કરી રહી છે અને કાયદેસરની આગળની કાર્યવાહી હાથ ધરી છે.
