તમિલનાડુના કલ્લાત્મકુરિચીથી ટીવીકેના ધારાસભ્ય સી. અરુલ વિગ્નેશ પર એક મહિલા જિલ્લા કલેક્ટરને વોટ્સએપ પર અયોગ્ય અને અશોભનીય મેસેજ મોકલવાનો ગંભીર આરોપ લાગ્યો છે, જેના કારણે રાજકારણમાં ભારે ગરમાવો આવ્યો છે. આ વિવાદ વચ્ચે તમિલનાડુ કોંગ્રેસ કમિટી (TNCC) ના પ્રમુખ મણિકમ ટાગોરે બુધવારે પત્રકારો સાથે વાતચીત કરતા ધારાસભ્યનો બચાવ કર્યો હતો અને તેમને નિર્દોષ (પાવમ) ગણાવ્યા હતા. ટાગોરે જણાવ્યું હતું કે ધારાસભ્યએ પોતે આ પ્રકારનો કોઈ પણ મેસેજ મોકલ્યા હોવાના આરોપોને સ્પષ્ટપણે નકારી કાઢ્યા છે અને આ મામલે સત્તાવાળાઓને સીસીટીવી ફૂટેજ પણ તપાસવાની ઓફર કરી છે.
આ મામલો ત્યારે વધુ ચર્ચામાં આવ્યો જ્યારે કોંગ્રેસના જ સાંસદો એસ. જ્યોતિમણિ અને આર. સુધાએ આ ઘટનાની આકરી ટીકા કરી હતી અને મુખ્યમંત્રી તેમજ શાસક પક્ષ પાસે ધારાસભ્ય સામે કડક કાર્યવાહીની માંગણી કરી હતી. આ વિરોધાભાસ અંગે પૂછવામાં આવતા મણિકમ ટાગોરે વિપક્ષી નેતા ઉદયનિધિ સ્ટાલિનના અગાઉના એક વિવાદિત નિવેદનનો ઉલ્લેખ કરીને સ્પષ્ટતા કરી હતી કે જે ઘટના બની જ નથી તેની સરખામણી વાસ્તવિક ઘટનાઓ સાથે કરવી બિલકુલ યોગ્ય નથી. તેમણે ઉમેર્યું હતું કે જો ધારાસભ્ય સામે કોઈ સત્તાવાર ફરિયાદ હોય અથવા તેઓ જાહેરમાં કંઈ બોલ્યા હોય તો તેની નોંધ લઈ શકાય છે, પરંતુ વગર આધામે પાયાની અટકળો લગાવવી અયોગ્ય છે.
મહિલા IAS અધિકારી દ્વારા આ મામલો મુખ્ય સચિવ એમ. સાઈ કુમારના ધ્યાને મૂક્યા બાદ કલેક્ટરને સુરક્ષા પૂરી પાડવામાં આવી હોવાના અહેવાલો પર પણ ટાગોરે પ્રતિક્રિયા આપી હતી. તેમણે જણાવ્યું હતું કે જિલ્લા વહીવટીતંત્રના કામકાજ માટે કલેક્ટર અને મુખ્ય સચિવ વચ્ચે નિયમિત વાતચીત થતી હોય છે અને આ પ્રકારના રૂટીન સંવાદોમાં બિનજરૂરી શંકાઓ કે પૂર્વગ્રહો રાખવા યોગ્ય નથી. કોંગ્રેસ પ્રમુખના આ નિવેદનથી તમિલનાડુના રાજકારણમાં એક નવો વળાંક આવ્યો છે, જ્યાં એક તરફ વિરોધીઓ ધારાસભ્ય સામે સખત પગલાંની માંગ કરી રહ્યા છે, તો બીજી તરફ સાથી પક્ષના નેતા દ્વારા તેમનો બચાવ કરવામાં આવી રહ્યો છે.
