લદાખ પ્રશાસન દ્વારા લેહ અને કારગિલમાં આચારસંહિતાના અમલ દરમિયાન રાજકીય વિરોધ, ધરણા, રેલીઓ અને સામૂહિક દેખાવો પર સંપૂર્ણ પ્રતિબંધ ફરમાવવામાં આવ્યો છે. ચીફ ઇલેક્ટોરલ ઓફિસર રાહુલ શર્મા દ્વારા જારી કરાયેલા આ આદેશ મુજબ, મુક્ત અને ન્યાયી ચૂંટણી યોજવા તથા કાયદો અને વ્યવસ્થા જાળવી રાખવા માટે આ પગલું અનિવાર્ય હતું. મુનિસિપલ હદ વિસ્તારમાં કોઈપણ પ્રકારની ભૂખ હડતાળ કે વિરોધ પ્રદર્શન યોજવા પર કડક પ્રતિબંધ મૂકવામાં આવ્યો છે અને નિયમોનું ઉલ્લંઘન કરનારાઓ સામે કાયદેસરની કાર્યવાહીના નિર્દેશ આપ્યા છે.
આ પ્રશાસકીય પ્રતિબંધો સામે પ્રખ્યાત પર્યાવરણવાદી કાર્યકર સોનમ વાંગચુકે ઉગ્ર વિરોધ નોંધાવ્યો છે અને કેન્દ્ર સરકારને આ મામલે તાત્કાલિક હસ્તક્ષેપ કરવા માટે અપીલ કરી છે. સોશિયલ મીડિયા પર એક વીડિયો શેર કરતા તેમણે લેહ અને કારગિલના અગ્રણી નેતાઓ અને સાંસદો સાથે મળીને રાષ્ટ્રપતિ દ્રોપદી મુર્મુ, વડાપ્રધાન નરેન્દ્ર મોદી, ગૃહમંત્રી અમિત શાહ અને લોકસભામાં વિપક્ષના નેતા રાહુલ ગાંધી સમક્ષ પોતાની વેદના વ્યક્ત કરી છે. લોકશાહીની પુનઃસ્થાપના અંગેની વાતચીતો અટકી પડી હોવાનો આક્ષેપ કરીને તેમણે જણાવ્યું હતું કે પ્રશાસન સ્થાનિક લોકોની ચિંતાઓને નજરઅંદાજ કરીને ઉતાવળે ચૂંટણીઓ યોજી રહ્યું છે.
હવામાનની પ્રતિકૂળ પરિસ્થિતિઓ, ભારે બરફવર્ષા અને સ્થાનિક નાગરિકોના મોસમી સ્થળાંતર વચ્ચે ચૂંટણી યોજવાના સમય સામે પણ ગંભીર સવાલો ઉઠાવવામાં આવ્યા છે. લેહ અને કારગિલ મ્યુનિસિપલ કમિટીઓ અને પંચાયતો માટે આગામી ૨૧ નવેમ્બરે જ્યારે લદાખ ઓટોનૉમસ હિલ ડેવલપમેન્ટ કાઉન્સિલ માટે ૪ ડિસેમ્બરે મતદાન યોજાવાનું નિર્ધારિત છે. જો કેન્દ્ર સરકાર દ્વારા સમયસર કોઈ યોગ્ય પગલાં લેવામાં નહીં આવે, તો લદાખના નાગરિકો શાંતિપૂર્ણ પરંતુ તીવ્ર આંદોલન શરૂ કરવા મજબૂર બનશે તેવી સ્પષ્ટ ચેતવણી સોનમ વાંગચુકે ઉચ્ચારી છે.
