વડાપ્રધાન નરેન્દ્ર મોદીની અધ્યક્ષતામાં મળેલી કેન્દ્રીય મંત્રીમંડળની બેઠકમાં દેશના વિકાસ અને જનકલ્યાણ માટે પાંચ મોટા અને ઐતિહાસિક નિર્ણયો પર મહોર મારવામાં આવી છે. આશરે ૭૭ હજાર કરોડ રૂપિયાના આ વિશાળકાય પેકેજમાં સૌથી મોટો લાભ ખેડૂતો અને નાના વેપારીઓને મળશે. સરકાર દ્વારા રવિ સીઝન ૨૦૨૬-૨૭ માટે ફર્ટિલાઇઝર સબ્સિડી પેટે ૬૨,૩૭૦ કરોડ રૂપિયા ફાળવવામાં આવ્યા છે, જેનાથી અન્નદાતાઓને ફોસ્ફેટિક અને પોટાશ ખાતરો અત્યંત સસ્તા અને યોગ્ય ભાવે મળી રહેશે. અગાઉની સીઝનની સરખામણીમાં આ બજેટમાં મોટો વધારો કરવામાં આવ્યો છે, જે કૃષિ ક્ષેત્રને વધુ મજબૂત બનાવવાની સરકારની પ્રતિબદ્ધતા દર્શાવે છે.
નાના સાહસિકો અને મહિલાઓને આત્મનિર્ભર બનાવવાના ઉદ્દેશ્યથી કેન્દ્ર સરકારે સ્ટેન્ડ-અપ ઇન્ડિયા યોજના અને માઇક્રો યુનિટ્સ માટે ક્રેડિટ ગેરંટી ફંડ (CGFMU) ને આગામી વર્ષ ૨૦૩૧ સુધી લંબાવવાનો મહત્વનો નિર્ણય કર્યો છે. આ યોજનાઓ અંતર્ગત મહિલાઓ, અનુસૂચિત જાતિ અને જનજાતિના નવા ઉદ્યોગસાહસિકોને સરળતાથી લોન મળી રહે તે માટે અનુક્રમે ૪,૧૧૧ કરોડ અને ૫,૦૦૦ કરોડ રૂપિયાના કોર્પસને મંજૂરી આપવામાં આવી છે. પ્રધાનમંત્રી મુદ્રા યોજના હેઠળ લાખો નાના વેપારીઓને ધિરાણનું જોખમ ઘટાડવા માટે આ ક્રેડિટ ગેરંટી અત્યંત ઉપયોગી સાબિત થશે, જેનાથી દેશના આર્થિક વિકાસને વેગ મળશે.
આ ઉપરાંત, દેશના ઇન્ફ્રાસ્ટ્રક્ચર અને સાંસ્કૃતિક વારસાને વેગ આપવા માટે પણ અન્ય બે મહત્વના પ્રોજેક્ટ્સને લીલી ઝંડી મળી છે. નોઇડા મેટ્રો રેલ પ્રોજેક્ટના વિસ્તરણ અંતર્ગત એક્વા લાઇન પર નોઇડા સેક્ટર-૫૧ થી ગ્રેટર નોઇડા સેક્ટર-૪ સુધીના નવા ૮.૪ કિલોમીટર લાંબા કોરિડોરનું નિર્માણ થશે, જેથી દૈનિક મુસાફરોને મોટી રાહત મળશે. સાથે જ, નવી દિલ્હી ખાતે ૩,૨૩૦ કરોડ રૂપિયાના ખર્ચે 'યુગે યુગીન ભારત સંગ્રહાલય' (YYBM) વિકસાવવાના પ્રસ્તાવને પણ મંજૂરી આપવામાં આવી છે, જે દેશના સમૃદ્ધ ઇતિહાસ અને સંસ્કૃતિને વૈશ્વિક સ્તરે ઉજાગર કરશે.
