પશ્ચિમ બંગાળના કોલકાતાના ગરિયા વિસ્તારમાં આવેલા ફર્તાબાદમાં બનેલી ૨૫ વર્ષીય સોફ્ટવેર એન્જિનિયર સાર્થક સરકારની રહસ્યમય હત્યાની તપાસ હાલ જટિલ વળાંક પર પહોંચી ગઈ છે. પોલીસે આ કેસમાં મૃતકની લિવ-ઇન પાર્ટનર ૨૨ વર્ષીય સંચાલિકા બસુ અને તેની માતા મૌમિતા બસુની ધરપકડ કરી છે, પરંતુ ઘટનામાં વપરાયેલું ચોક્કસ હથિયાર અને હુમલા પાછળનું સાચું કારણ હજુ સુધી અકબંધ છે. પોલીસ એ વાતની તપાસ કરી રહી છે કે ગળા પર થયેલો ઘા કરવા માટે કોઈ ધારદાર વસ્તુ કે પછી ચોપસ્ટિક જેવા પાતળા સાધનનો ઉપયોગ થયો હતો કે કેમ.
તપાસ દરમિયાન બંને આરોપી મહિલાઓ દ્વારા વારંવાર બદલાતા નિવેદનોએ પોલીસની મુશ્કેલીમાં વધારો કર્યો છે. પૂછપરછમાં સંચાલિકાએ પહેલા દાવો કર્યો હતો કે સાર્થકે કાતર વડે જાતે જ પોતાના ગળા પર ઈજા પહોંચાડી હતી, જ્યારે અન્ય એક તબક્કે તેણે એવું પણ જણાવ્યું કે તે ઉગ્ર બોલાચાલી દરમિયાન શું બન્યું હતું તે યાદ રાખી શકી નથી. પ્રાથમિક તપાસ મુજબ શનિવારે મોડી રાત્રે દારૂના નશામાં બંને વચ્ચે અન્ય સંબંધોની શંકાને લઈને ઉગ્ર ઝઘડો થયો હતો, જે બાદ મામલો લોહીયાળ સંઘર્ષમાં ફેરવાઈ ગયો હતો.
શનિવાર રાત્રે દોઢ વાગ્યાની આસપાસ ફ્લેટમાંથી એક યુવતી રડતી બહાર આવીને મદદ માંગતી દેખાઈ ત્યારે આ ભયાનક ઘટના પ્રકાશમાં આવી હતી. પાડોશીઓ જ્યારે ત્યાં પહોંચ્યા ત્યારે સાર્થક લોહીથી લથપથ પલંગ પર મૃત હાલતમાં મળી આવ્યો હતો અને યુવતીના ગળા પર પણ નખના નિશાન જોવા મળ્યા હતા. પોલીસે તેને તાત્કાલિક હોસ્પિટલ પહોંચાડ્યો હતો જ્યાં તબીબોએ તેને મૃત જાહેર કર્યો. હાલ પોલીસ બંને આરોપીઓની કસ્ટડીમાં કડક પૂછપરછ કરી રહી છે અને ઘટનાક્રમની સાચી કડીઓ જોડવાનો પ્રયાસ કરી રહી છે જેથી હત્યાનું રહસ્ય સંપૂર્ણપણે ઉકેલી શકાય.
