ટેકનોલોજી જગતમાં હલચલ મચાવનાર આ મામલામાં અમેરિકી ગુપ્તચર એજન્સીઓ દ્વારા એવો દાવો કરવામાં આવ્યો છે કે એક ચીની મહિલા બિઝનેસ એક્ઝિક્યુટિવ બેઇજિંગ માટે જાસૂસી કરતી હતી અને તેના સંબંધો એનવીડિયાના સીઈઓ જેેનસન હુઆંગ સાથે ઘનિષ્ઠ હતા. આ અહેવાલો સામે આવ્યા બાદ એનવીડિયાના બોર્ડે રવિવારે એક સ્વતંત્ર તપાસની જાહેરાત કરી હતી, જેના કારણે કંપનીના શેરમાં સાત મહિનાની નીચી સપાટી જોવા મળી હતી. આ વિવાદ વચ્ચે જેેનસન હુઆંગે સ્વીકાર્યું છે કે તેઓ એક બિઝનેસ એક્ઝિક્યુટિવ સાથે ઘનિષ્ઠ સંબંધોમાં હતા, જોકે તેમણે તે મહિલાનું નામ જાહેર કર્યું નથી. હુઆંગે ખુલ્લો પત્ર લખીને પોતાની પત્ની અને કંપનીની માફી માંગી છે તેમજ આ તપાસમાં સંપૂર્ણ સહકાર આપવાની વચનબદ્ધતા વ્યક્ત કરી છે.
આ સમગ્ર પ્રકરણ અંગે વ્હાઇટ હાઉસ ખાતે પત્રકાર પરિષદમાં વાત કરતા રાષ્ટ્રપતિ ડોનાલ્ડ ટ્રમ્પે જણાવ્યું હતું કે તેમણે હુઆંગને સીધો પ્રશ્ન પૂછ્યો હતો કે શું તેમને ખબર હતી કે તે મહિલા જાસૂસ છે, જેના જવાબમાં હુઆંગે નકારાત્મક જવાબ આપ્યો હતો અને ટ્રમ્પે આ વાત પર ભરોસો પણ વ્યક્ત કર્યો હતો. ટ્રમ્પે હુઆંગને 'ખૂબ જ સન્માનિત વ્યક્તિ' ગણાવતા કહ્યું હતું કે તેઓ આ મામલે સંપૂર્ણપણે નિર્દોષ સાબિત થશે અને એફબીઆઈ આ મામલાની ઊંડાણપૂર્વક તપાસ કરી રહી છે. સિલિકોન વેલીમાં ટ્રમ્પના સૌથી નજીકના સાથીઓમાં ગણાતા હુઆંગ અગાઉ પણ વ્હાઇટ હાઉસની મુલાકાતો દરમિયાન પ્રશાસનના એજન્ડાને સમર્થન આપી ચૂક્યા છે અને અમેરિકી રાષ્ટ્રીય સુરક્ષાની રક્ષા કરવા માટે કટિબદ્ધ હોવાનું જણાવ્યું છે.
બીજી બાજુ, ચીનના વિદેશ મંત્રાલયના પ્રવક્તાએ આ તમામ આરોપોને ફગાવી દીધા છે અને તેને બેઇજિંગ વિરુદ્ધ બદનામ કરવાનું અભિયાન ગણાવ્યું છે. ચીનનું માનવું છે કે આ દાખલાઓ પાયાવિહોણા છે અને તેનો કોઈ નક્કર આધાર નથી. તેમ છતાં, અમેરિકી ગુપ્તચર વિભાગ અને એફબીઆઈની સક્રિયતાને કારણે આ મામલો આંતરરાષ્ટ્રીય સ્તરે ચર્ચાનો વિષય બન્યો છે. ટેકનોલોજી માર્કેટ અને વૈશ્વિક રાજકારણ પર આ ઘટનાની ઘાતક અસરો જોવા મળી રહી છે, ત્યારે આગામી સમયમાં તપાસના અહેવાલો બાદ જ આ રહસ્ય પરથી સંપૂર્ણ પડદો ઉંચકાશે તેવી આશા રાખવામાં આવી રહી છે.
