અમેરિકી રાજકારણમાં હાલમાં એક મોટો હિલચાલ જોવા મળી રહી છે જ્યાં કેન્ટુકીના પીઢ રિપબ્લિકન સાંસદ થોમસ મેસીએ સોમવારે રક્ષામંત્રી પીટ હેગસેથ વિરુદ્ધ મહાભિયોગના આઠ અનુચ્છેદો રજૂ કર્યા છે. મેસીનો આક્ષેપ છે કે રક્ષામંત્રીએ સૈન્ય અભિયાનો દરમિયાન બંધારણીય અને કાનૂની સીમાઓનું ગંભીર ઉલ્લંઘન કર્યું છે. કોંગ્રેસની મંજૂરી વગર ઈરાન સામે યુદ્ધ ચલાવવું, નાગરિકોની સુરક્ષાની ઉપેક્ષા કરવી અને યેમેન તથા વેનેઝુએલામાં મનસ્વી રીતે સૈન્ય કાર્યવાહીના આદેશ આપવા જેવા ગંભીર મુદ્દાઓ આ પ્રસ્તાવમાં સામેલ છે. એટલું જ નહીં, સેનેટર માર્ક કેલી દ્વારા વાણી સ્વાતંત્ર્યના અધિકારનો ઉપયોગ કરવા બદલ તેમની સામે બદલો લેવાનો પણ હેગસેથ પર આરોપ મૂકવામાં આવ્યો છે.
આ મહાભિયોગ પ્રસ્તાવ લાવનાર થોમસ મેસી પોતે રિપબ્લિકન પાર્ટીના જ નેતા છે અને તેઓ પોતાની જ પાર્ટીના નેતૃત્વ સામે અવારનવાર પડકાર ફેંકવા માટે જાણીતા છે. સાત ટર્મથી પ્રતિનિધિ ગૃહમાં સેવા આપી રહેલા મેસી સરકારી અધિકારીઓને જવાબદાર ઠેરવવાની દિશામાં સતત પ્રયાસ કરી રહ્યા છે. રાષ્ટ્રપતિ ડોનાલ્ડ ટ્રમ્પના સમર્થનવાળા હરીફ સામે પ્રાઈમરી ચૂંટણી હાર્યા બાદ તેઓ હાલમાં નિવૃત્ત થઈ રહેલા કોંગ્રેસમેન છે, પરંતુ સપ્ટેમ્બરથી જ તેઓ હેગસેથ સામે મહાભિયોગની માંગણી કરતા આવ્યા છે. તેમનું માનવું છે કે હેગસેથે વોર પાવર્સ રેઝોલ્યુશનના નિયમો વિરુદ્ધ જઈને કોંગ્રેસની મંજૂરી વિના ઈરાનમાં ૯૦ દિવસથી વધુ સમય સુધી સંઘર્ષ લંબાવ્યો હતો.
આગામી બે દિવસની અંદર જ હાઉસ ઓફ રિપ્રેઝન્ટેટિવ્સમાં આ મુદ્દે કાયદાકીય વિચારણા હાથ ધરવામાં આવી શકે છે, જ્યાં કાયદા ઘડનારાઓ આ પ્રસ્તાવ પર મતદાન કરી શકે છે અથવા તેને ટેબલ પર મૂકવાના પ્રસ્તાવને મંજૂર કરી શકે છે. મેસીના મતે આ પગલાં દ્વારા સરકારને એક સ્પષ્ટ સંદેશો આપવાનો પ્રયાસ છે અને જો ભવિષ્યમાં ડેમોક્રેટ્સ કોંગ્રેસ પર નિયંત્રણ મેળવશે તો તેઓ આ દિશામાં વધુ કડક પગલાં પણ ભરી શકે છે. આ સમગ્ર ઘટનાક્રમથી અમેરિકી સંરક્ષણ વિભાગ અને વ્હાઈટ હાઉસની કાર્યશૈલી સામે મોટા સવાલો ઊભા થયા છે.
