કર્મચારી ભવિષ્ય નિધિ સંગઠન (EPFO) દ્વારા પોતાના કરોડો ખાતાધારકો માટે એક અત્યંત મહત્વપૂર્ણ અને રાહતરૂપ જાહેરાત કરવામાં આવી છે. જો તમારા ઈપીએફ (EPF) ખાતામાં નામ, જન્મતારીખ કે નોકરીના સમયગાળાને લગતી કોઈપણ માહિતી ખોટી દર્શાવેલી હોય, તો તેને હવે નજરઅંદાજ ન કરવી જોઈએ કારણ કે આવી નાની ભૂલો ભવિષ્યમાં પૈસા ઉપાડતી વખતે કે પેન્શન ક્લેમ સેટલ કરતી વખતે મોટા અડચણરૂપ સાબિત થઈ શકે છે. આ સમસ્યાના નિવારણ માટે EPFOએ ઓનલાઈન ‘જોઈન્ટ ડિક્લેરેશન ફેસિલિટી’ રજૂ કરી છે, જેની મદદથી સભ્યો ઘરે બેઠા જ પોતાના પર્સનલ અને પ્રોફેશનલ રેકોર્ડમાં જરૂરી સુધારા માટે અરજી કરી શકે છે. સોશિયલ મીડિયા પર માહિતી આપતા સંગઠને જણાવ્યું છે કે પાત્ર સભ્યો મેમ્બર પોર્ટલ પર જઈને પોતાના દસ્તાવેજોના આધારે આ વિગતો અપડેટ કરી શકે છે.
આ પ્રક્રિયાને અત્યંત સરળ બનાવવામાં આવી છે જેને માત્ર પાંચ સ્ટેપમાં ઓનલાઈન પૂર્ણ કરી શકાય છે. સૌપ્રથમ સભ્યે EPFO ના અધિકૃત મેમ્બર પોર્ટલ પર પોતાના યુનિવર્સલ અકાઉન્ટ નંબર (UAN) અને પાસવર્ડ દ્વારા લોગ ઇન કરવાનું રહે છે. ત્યારબાદ પોર્ટલ પર ઉપલબ્ધ ‘Joint Declaration Facility’ ના વિકલ્પ પર ક્લિક કરીને તે માહિતી પસંદ કરવાની હોય છે જેમાં ફેરફાર કરવાનો છે. યોગ્ય વિગતો ભર્યા બાદ સંબંધિત સચોટ દસ્તાવેજો અપલોડ કરવાના રહે છે અને છેલ્લે તમામ માહિતીની ચકાસણી કરીને અરજી ફાઇનલ સબમિટ કરવાની હોય છે. આ ડિજિટલ પ્રક્રિયાથી કર્મચારીઓનો કચેરીએ જવાનો સમય બચે છે અને તેમના રેકોર્ડ હંમેશાં અપડેટ રહે છે, જેનાથી ભવિષ્યમાં કોઈપણ પ્રકારની અસુવિધાથી બચી શકાય છે.
ડિજિટલ સેવાઓના વિસ્તાર સાથે EPFO એ ગ્રાહક સેવાઓને વધુ પારદર્શક અને ઝડપી બનાવી છે. શ્રમ મંત્રાલયના આંકડા મુજબ, તાજેતરમાં ચલાવાયેલા વિશેષ અભિયાન દરમિયાન સંગઠને લક્ષ્યાંક કરતા ૧૫ ટકા વધુ એટલે કે અંદાજે ૨.૩૬ લાખથી વધુ જાહેર ફરિયાદોનો સફળ નિકાલ કર્યો છે. આ ઉપરાંત, હવે સભ્યો પોતાની સુવિધા માટે વેરિફાઈડ વોટ્સએપ સેવા દ્વારા પણ પીએફ બેલેન્સ, પાસબુક અને છેલ્લા પાંચ ટ્રાન્ઝેક્શન જેવી મહત્વપૂર્ણ જાણકારી ઘર બેઠા મેળવી શકે છે. આ તમામ બાબતો દર્શાવે છે કે EPFO તેના ગ્રાહકોને વધુ સશક્ત અને ટેકનોલોજી-સભર બનાવી રહ્યું છે, જેથી દરેક કર્મચારી પોતાના ભવિષ્ય નિધિ ખાતાને સુરક્ષિત અને ચોક્કસ રાખી શકે.
