પશ્ચિમ બંગાળના દક્ષિણ 24 પરગણા જિલ્લાના કાનિંગ (પશ્ચિમ) મતવિસ્તારના વિવાદાસ્પદ તૃણમૂલ કોંગ્રેસ (ટીએમસી) ધારાસભ્ય પરેશ રામ દાસને કોલકાતાના નેતાજી સુભાષચંદ્ર બોઝ ઇન્ટરનેશનલ એરપોર્ટ પરથી સોમવારે સાંજે ઝડપી પાડવામાં આવ્યા હતા. પ્રાપ્ત માહિતી અનુસાર, તેઓ ગુપ્ત રીતે મુંબઈ ભાગી જવાની ફિરાકમાં હતા તે દરમિયાન ખાસ ગુપ્તચર અહેવાલના આધારે બારિપુર પોલીસ જિલ્લાની સ્પેશિયલ ઓપરેશન્સ ગ્રૂપ અને બિધાનનગર સિટી પોલીસે સંયુક્ત ઓપરેશન હાથ ધરીને તેમની ધરપકડ કરી હતી. ધારાસભ્ય પરેશ રામ દાસ એક હાઈ-પ્રોફાઈલ બળાત્કાર અને ખંડણીના કેસમાં છેલ્લા ૧૭ દિવસથી કાયદાની પકડથી બચીને ફરાર ચાલી રહ્યા હતા અને પશ્ચિમ બંગાળ પોલીસના ક્રાઈમ ઇન્વેસ્ટિગેશન ડિપાર્ટમેન્ટ (સીઆઈડી) દ્વારા જારી કરાયેલા સમન્સનો પણ તેમણે વારંવાર અસ્વીકાર કર્યો હતો.
આ ગંભીર પ્રકરણની શરૂઆત સપ્ટેમ્બર મહિનામાં થઈ હતી, જ્યારે પીડિત મહિલાએ કાનિંગના સબ-ડિવિઝનલ પોલીસ અધિકારી (SDPO) સમક્ષ લેખિત ફરિયાદ નોંધાવી હતી. પીડિતાના આક્ષેપ મુજબ, વર્ષ 2023ની પંચાયત ચૂંટણી પહેલા ધારાસભ્યએ ટિકિટ અપાવવાના બહાને તેના પતિ પાસે 4 લાખ રૂપિયાની માંગણી કરી હતી. જ્યારે મહિલા આ નાણાં આપવા માટે ધારાસભ્ય દ્વારા સંચાલિત વૃદ્ધાશ્રમમાં પહોંચી, ત્યારે પરેશ રામ દાસે કથિત રીતે તેની પાસેથી નાણાં પડાવી લઈ, તેને રૂમમાં પૂરીને બળાત્કાર ગુજાર્યો હતો. એટલું જ નહીં, વર્ષ 2023માં જ્યારે પીડિતાએ સ્થાનિક પોલીસ મથકે ફરિયાદ કરવાનો પ્રયાસ કર્યો ત્યારે પોલીસે એફઆઈઆર નોંધવાનો ઇનકાર કર્યો હતો અને ધારાસભ્ય તથા તેમના સાગરિકો દ્વારા પીડિતાના પરિવારને સતત ધમકીઓ આપી તેમના પર બોમ્બ હુમલો પણ કરવામાં આવ્યો હતો. તાજેતરમાં રાજ્યમાં રાજકીય સમીકરણો બદલાતા પીડિતાને ન્યાયની આશા બંધાઈ હતી અને તેણે કાયદેસરની લડત વધુ મજબૂત બનાવી હતી.
પોલીસે જણાવ્યું હતું કે આ કેસમાં કાનિંગ પોલીસ સ્ટેશનમાં ભારતીય દંડ સંહિતાની કલમ 376 (બળાત્કાર), 323, 420, 120બી અને 506 હેઠળ ગુનો નોંધવામાં આવ્યો છે. આ મામલે સીઆઈડી દ્વારા અગાઉ એક વખત ધારાસભ્યની પૂછપરછ પણ કરવામાં આવી હતી, પરંતુ ઓક્ટોબરના અંતિમ સપ્તાહમાં તેઓ ભૂગર્ભમાં ઉતરી ગયા હતા. પોલીસની ટીમે કાનિંગ સ્થિત તેમના નિવાસસ્થાને દરોડા પાડીને ચાર સ્થાનિક ટીએમસી નેતાઓની અગાઉ જ ધરપકડ કરી લીધી હતી અને ફરાર ધારાસભ્યની શોધખોળ તેજ કરી હતી. મંગળવારે પકડાયેલા ધારાસભ્યને દક્ષિણ 24 પરગણાની જિલ્લા કોર્ટમાં રજૂ કરવામાં આવશે, જ્યાં પોલીસ તપાસને આગળ વધારવા માટે તેમના રિમાન્ડની માંગણી કરવામાં આવશે.
