વિક્રમ સંવત ૨૦૮૩ના નૂતન વર્ષના શુભારંભે ગુજરાતના મુખ્યમંત્રી ભૂપેન્દ્ર પટેલ પરંપરાગત ઉત્સાહ સાથે જનતાની વચ્ચે રહેશે. પોતાના દિવસની શરૂઆત આધ્યાત્મિક આસ્થા સાથે કરતા મુખ્યમંત્રી મંગળવારે સવારે ૭ કલાકે ગાંધીનગરના પંચદેવ મંદિર ખાતે પૂજા-અર્ચના કરી નવા વર્ષનો મંગલારંભ કરશે. ત્યારબાદ તેઓ સવારે ૭:૩૦ કલાકે અડાલજ સ્થિત ત્રિમંદિરમાં દર્શન અને પૂજન અર્ચન માટે ઉપસ્થિત રહેશે. જનકલ્યાણ અને રાજ્યની સમૃદ્ધિની કામના સાથેના આ ધાર્મિક આયોજન બાદ તેઓ સીધા નાગરિકોને મળવા માટે રવાના થશે, જ્યાં પ્રજાજનો સાથે સીધો સંવાદ કરવાનો તેમનો વિશેષ કાર્યક્રમ છે.
ધાર્મિક વિધિઓ સંપન્ન કર્યા બાદ મુખ્યમંત્રી સવારે ૮:૦૦ કલાકે ગાંધીનગર સ્થિત મંત્રીમંડળ નિવાસ સંકુલના કોમ્યુનિટી સેન્ટર ખાતે પહોંચશે. અહીં તેઓ ગાંધીનગરના નાગરિકો, આગેવાનો અને પ્રજાજનો સાથે પ્રત્યક્ષ મળીને નૂતન વર્ષાભિનંદનની આપ-લે કરશે. ત્યારબાદ સવારે ૮:૫૦ કલાકે તેઓ રાજભવનની મુલાકાતે જઈને રાજ્યના રાજ્યપાલ આચાર્ય દેવવ્રતજીને પુષ્પગુચ્છ અર્પણ કરી નવા વર્ષની હાર્દિક શુભેચ્છાઓ પાઠવશે. આ બેઠક દરમિયાન રાજ્યના વિકાસ અને લોકકલ્યાણના વિવિધ મુદ્દાઓ પર પણ સૌહાર્દપૂર્ણ ચર્ચા થવાની સંભાવના રહેલી છે.
ગાંધનગરના કાર્યક્રમો પૂર્ણ કર્યા બાદ મુખ્યમંત્રી અમદાવાદ તરફ પ્રયાણ કરશે, જ્યાં સવારે ૧૦:૦૦ કલાકે તેઓ ઐતિહાસિક ભદ્રકાળી માતાના મંદિરે દર્શનાર્થે જઈને રાજ્યની સુખાકારી માટે પ્રાર્થના કરશે. ત્યારબાદ સવારે ૧૦:૩૦ કલાકે અમદાવાદના શાહીબાગ સ્થિત એનેક્ષી સ્ટેટ ગેસ્ટ હાઉસ ખાતે તેઓ વિશાળ જનસમુદાય અને નાગરિકોને રૂબરૂ મળીને નૂતન વર્ષની શુભેચ્છાઓ સ્વીકારશે. આ ઉપરાંત, સવારે ૧૧:૪૫ કલાકે શાહીબાગ ડફનાળા ખાતે આવેલી પોલીસ ઓફિસર્સ મેસમાં વરિષ્ઠ પોલીસ અધિકારીઓ અને તેમના પરિવારો સાથે આયોજિત વિશેષ સ્નેહમિલન સમારોહમાં પણ મુખ્યમંત્રી ઉપસ્થિત રહીને સૌને નવા વર્ષની શુભકામનાઓ પાઠવશે.
