સુરેન્દ્રનગર જિલ્લામાં દિવાળી અને નૂતન વર્ષના તહેવારોની ધામધૂમથી શરૂઆત થઈ ચૂકી છે અને રવિવારથી જ સમગ્ર વિસ્તારમાં રજાઓનો માહોલ છવાયો છે. આ તહેવારી માહોલમાં ખરીદી કરવા તેમજ રોજિંદા વ્યવહારો માટે નાગરિકોને મોટા પ્રમાણમાં રોકડ રકમની આવશ્યકતા હોય છે, જેના માટે તેઓ બેંકના એટીએમ પર આધાર રાખતા હોય છે. પરંતુ તહેવારના આ મહત્વના દિવસોમાં જ સુરેન્દ્રનગર શહેર તેમજ સમગ્ર જિલ્લાભરમાં સેન્ટ્રલ બેંક ઓફ ઈન્ડિયાના તમામ એટીએમ સેન્ટર્સના શટર ડાઉન જોવા મળ્યા છે, જેના કારણે ગ્રાહકોમાં નિરાશા ફેલાઈ છે.
જ્યારે ગ્રાહક રોહિતભાઈ પટેલે આ અંગે બેંકના જવાબદાર અધિકારીઓનો સંપર્ક કરી પૂછપરછ કરી, ત્યારે ટેકનિકલ ખામી સર્જાઈ હોવાનું કારણ આગળ ધરીને તમામ એટીએમ બંધ હોવાની વાત સામે આવી હતી. માત્ર એટલું જ નહીં, આ ટેકનિકલ સમસ્યાને કારણે એટીએમ સેવાઓ હજુ આગામી એક અઠવાડિયા સુધી પૂર્વવત નહીં થાય અને બંધ જ રહેવાની શક્યતા વ્યક્ત કરવામાં આવી છે. તહેવારોની મોસમમાં જ એટીએમ જેવી અત્યંત આવશ્યક બેંકિંગ સેવા ઠપ્પ થઈ જવાથી ગ્રાહકોની મુશ્કેલીઓમાં અનેકગણો વધારો થયો છે.
પોતાના જ બેંકના એટીએમ બંધ હોવાના કારણે સેન્ટ્રલ બેંક ઓફ ઈન્ડિયાના ગ્રાહકોને હવે મજબૂર થઈને અન્ય ખાનગી કે રાષ્ટ્રીયકૃત બેંકોના એટીએમમાંથી નાણાં ઉપાડવા માટે રઝળપાટ કરવો પડી રહ્યો છે. અન્ય બેંકના એટીએમનો ઉપયોગ કરવાથી ગ્રાહકોના ખાતામાંથી વધારાનો ટ્રાન્ઝેક્શન ચાર્જ કપાઈ જવાની પણ ગંભીર ભીતિ સેવાઈ રહી છે. અવારનવાર વિવિધ કારણોસર હડતાલ અને સેવાકીય પ્રશ્નોમાં ઘેરાતી બેંકના કર્મીઓની આવી બેદરકારીને કારણે તહેવારો ટાંકણે જ ગ્રાહકોને હાલાકીનો સામનો કરવો પડતા લોકોમાં ભારે રોષની લાગણી ફેલાઈ છે.
