વૈશ્વિક સ્તરે ટેકનોલોજી જગતમાં મોટું નામ ધરાવતા અને વિશ્વના પાંચમા સૌથી ધનિક વ્યક્તિ માઇકલ ડેલ દક્ષિણ કોરિયાના અગ્રણી ઔદ્યોગિક જૂથ SK ગ્રુપમાં ૪૦૬ મિલિયન ડોલર એટલે કે આશરે ૫૪૪ અબજ વોનનું ભંડોળ રોકવા જઈ રહ્યા છે. રોયટર્સના અહેવાલ મુજબ, માઇકલ ડેલની ફેમિલી ઓફિસ સાથે જોડાયેલું ઇન્વેસ્ટમેન્ટ ફંડ SK ગ્રુપના ચેરમેન ચે તાઇ-વોનની હોલ્ડિંગ કંપની SK ઈંક માં આ મોટો હિસ્સો ખરીદશે. આ આર્થિક સોદો માત્ર એક વ્યાપારિક રોકાણ નથી, પરંતુ આંતરરાષ્ટ્રીય સ્તરે ચર્ચાનો વિષય બનેલા એક હાઈ-પ્રોફાઈલ પારિવારિક વિવાદ સાથે સીધો જોડાયેલો છે.
આ સમગ્ર સોદા પાછળની મુખ્ય પૃષ્ઠભૂમિ SK ગ્રુપના ચેરમેન ચે તાઇ-વોનની વ્યૂહરચના છે, જેઓ પોતાની પૂર્વ પત્ની રો સો-યોંગ સાથેના ઐતિહાસિક અને ચર્ચાસ્પદ છૂટાછેડાના સેટલમેન્ટની જંગી રકમ ચૂકવવા માટે ફંડ ભેગું કરી રહ્યા છે. પૂર્વ રાષ્ટ્રપતિના પુત્રી અને આર્ટ સેન્ટરના ડિરેક્ટર રો સો-યોંગ સામેના આ ડિવોર્સ કેસમાં સેટલમેન્ટ પેટે કુલ ૯૪૪ અબજ વોન ચૂકવવાના હોવાથી ચેરમેન ચે તાઇ-વોન પોતાના શેર વેચીને ભંડોળ એકત્ર કરી રહ્યા છે. રેગ્યુલેટરી ફાઇલિંગ મુજબ, તેઓ કંપનીમાં પોતાનો ૨.૨૬ ટકા હિસ્સો વેચવા માટે સહમત થયા છે, જેમાંથી મોટો ભાગ ડેલના ઇન્વેસ્ટમેન્ટ ફંડ દ્વારા ખરીદવામાં આવી રહ્યો છે.
આ વ્યાપારિક ભાગીદારી ભવિષ્યમાં બંને વૈશ્વિક જૂથોના સંબંધોને વધુ મજબૂત બનાવવામાં સીમાચિહ્નરૂપ સાબિત થઈ શકે છે. માઇકલ ડેલની કંપની ડેલ ટેકનોલોજીસ AI સર્વર અને ડેટા સેન્ટર ક્ષેત્રે અગ્રેસર છે, અને તેના SK ગ્રુપની પ્રખ્યાત ચિપમેકર યુનિટ SK હાઇનિક્સ સાથે પહેલેથી જ ગાઢ વ્યાપારિક સંબંધો છે જે ડેટા સેન્ટર્સ માટે હાઇ-પર્ફોર્મન્સ મેમરી ચિપ્સ પૂરી પાડે છે. આમ, એક તરફ જ્યાં ચેરમેન ચે તાઇ-વોનને તેમના ડિવોર્સ સેટલમેન્ટ માટે જરૂરી નાણાકીય રાહત મળી રહી છે, તો બીજી તરફ ટેકનોલોજી અને ચિપ નિર્માણ ક્ષેત્રના આ બે દિગ્ગજો વચ્ચેના વ્યૂહાત્મક સંબંધો નવી ઊંચાઈઓ સર કરવા માટે તૈયાર છે.
