શનિવારે સાંજે બનેલી આ ઘટના મુજબ, ૧૭૮ મુસાફરોને લઈને ઈન્ડિગોની ફ્લાઈટ 6E 451 કેમ્પેગૌડા ઈન્ટરનેશનલ એરપોર્ટ પરથી સાંજે આશરે 5:50 વાગ્યે લખનૌ જવા માટે રવાના થઈ હતી. ટેકઓફ થયાના અંદાજે ૩૦ મિનિટ બાદ, જ્યારે એક મુસાફર પ્લેનના શૌચાલયમાં ગયો ત્યારે તેને ત્યાં એક કાગળની ચિઠ્ઠી મળી આવી હતી. આ ચિઠ્ઠીમાં લખ્યું હતું કે, "આ વિમાન બરાબર 6:30 વાગ્યે હાઈજેક થવાનું છે." મુસાફરે તાત્કાલિક આ અંગે કેબિન ક્રૂને જાણ કરી હતી, જેમણે પરિસ્થિતિની ગંભીરતા સમજીને પાયલોટને વાકેફ કર્યા હતા અને પ્રોટોકોલ મુજબ વિમાનને પાછું બેંગલુરુ એરપોર્ટ તરફ વાળવાનો નિર્ણય લેવાયો હતો.
વિમાન બેંગલુરુ એરપોર્ટ પર લેન્ડ થયા બાદ સુરક્ષા એજન્સીઓ તરત જ હરકતમાં આવી ગઈ હતી. વરિષ્ઠ પોલીસ અધિકારીના જણાવ્યા અનુસાર, સુરક્ષા દળો દ્વારા પ્લેનની અંદર લગભગ ૯૦ મિનિટ સુધી સઘન અને ઝીણવટભરી તપાસ ચલાવવામાં આવી હતી. આ લાંબી તપાસના અંતે સુરક્ષા એજન્સીઓએ સ્પષ્ટ કર્યું હતું કે આ ધમકી માત્ર એક અફવા (હોક્સ) હતી અને પ્લેનમાં કોઈ શંકાસ્પદ વસ્તુ મળી ન હતી. તમામ સુરક્ષા તપાસ સફળતાપૂર્વક પૂર્ણ થયા બાદ મોડી રાત્રે આ ફ્લાઈટે તેના નિર્ધારિત ગંતવ્ય સ્થાન તરફ ફરીથી પ્રયાણ કર્યું હતું જેથી મુસાફરો મુસાફરી ચાલુ રાખી શકે.
ઘટના અંગે માહિતી આપતા ઈન્ડિગો એરલાઇન્સના પ્રવક્તાએ જણાવ્યું હતું કે મુસાફરો, ક્રૂ અને વિમાનની સલામતી હંમેશા તેમની સર્વોચ્ચ પ્રાથમિકતા રહી છે. સ્ટાન્ડર્ડ ઓપરેટિંગ પ્રોસિજર (SOP)નું પાલન કરીને સંબંધિત સુરક્ષા સત્તાવાળાઓને તાત્કાલિક જાણ કરવામાં આવી હતી. એરલાઇન્સે મુસાફરોને થતી અસુવિધા ઘટાડવા માટે તેમને રિફ્રેશ્ડમેન્ટ્સ પૂરું પાડ્યું હતું અને સમયસર તમામ અપડેટ્સ શેર કર્યા હતા. આ ઘટનાએ ઉડ્ડયન ક્ષેત્રે મુસાફરોની સુરક્ષા અને અફવાઓ ફેલાવનારાઓ સામે કડક પગલાં લેવાની જરૂરિયાત પર ફરી એકવાર ભાર મૂક્યો છે.
