કલકત્તા સ્થિત કાલીઘાટ વિસ્તારમાં આવેલ ડાયમંડ હાર્બરના સાંસદ અભિષેક બેનર્જીના નિવાસસ્થાન પર વહેલી સવારે થયેલા હુમલા બાદ પશ્ચિમ બંગાળનું રાજકારણ ગરમાયું છે. મમતા બેનર્જીએ આક્રમક વલણ અપનાવતા આરોપ લગાવ્યો છે કે ભાજપ સમર્થિત અસામાજિક તત્વોએ પોલીસની મિલીભગતથી રાત્રિના સુમારે ઘરોને નિશાન બનાવ્યા છે. આ ઘટના રાજ્યમાં વ્યાપેલા કાયદાકીય અરાજકતા અને ભયના વાતાવરણને ઉજાગર કરે છે, જેને કોઈપણ સંજોગોમાં સાંખી લેવામાં આવશે નહીં તેમ તેમણે સ્પષ્ટ શબ્દોમાં જણાવ્યું હતું.
પોલીસ દ્વારા કરવામાં આવતી કનડગત અને વિસ્તારમાં લાદવામાં આવેલા પ્રતિબંધો સામે વિરોધ નોંધાવતા મમતા બેનર્જીએ ભાજપ સામે સીધો મોરચો ખોલ્યો છે. તેમણે પડકાર ફેંકતા કહ્યું કે, 'તમારી પાસે કેટલા બુલડોઝર છે? તે બધાને અહિયાં લઈ આવો. જો તમારામાં હિંમત હોય તો અહીં આવો અને મારી છાતી પર બુલડોઝર ચલાવો.' તેમણે વધુમાં ઉમેર્યું હતું કે તેઓ અત્યાચાર અને ધાકધમકીઓ સામે પોતાનો અવાજ સતત બુલંદ કરતા રહેશે અને આવી કોઈ ગિદડભભકીથી ડરવાના નથી.
રાજ્યમાં કાયદો અને વ્યવસ્થાની સ્થિતિ પર સવાલો ઉઠાવતા મમતા બેનર્જીએ મધ્યરાત્રિએ થતી આવી હિંસાત્મક ગતિવિધિઓ સામે રોષ વ્યક્ત કર્યો હતો. તેમણે આક્ષેપ કર્યો કે મધરાતે બે-ત્રણ વાગ્યે ભાજપના ગુંડાઓ પોલીસને સાથે રાખીને સામાન્ય નાગરિકોના ઘરો પર હુમલા કરી રહ્યા છે. આ પ્રકારની કાયરતાપૂર્ણ હરકતોથી બંગાળની જનતા ઝૂકશે નહીં અને પ્રશાસન તથા સત્તાધારી પક્ષના અન્યાય સામે જનઆંદોલન વધુ તીવ્ર બનાવવામાં આવશે તેવી ચેતવણી પણ તેમણે આપી છે.
