પોલેન્ડના બીજા સૌથી મોટા અને ઐતિહાસિક શહેર ક્રાકોમાં શનિવારે બપોરે સર્જાયેલી એક ગોઝારી ઘટનાએ સમગ્ર દેશને હચમચાવી દીધો છે. સ્થાનિક પોલીસના જણાવ્યા અનુસાર, પોલેન્ડના જ એક નાગરિકે મિલિટરી સ્ટાઈલના કપડા પહેરીને અને અત્યાધુનિક હથિયાર સાથે શહેરના અત્યંત વ્યસ્ત ગણાતા 'મેઈન સ્ક્વેર' માર્કેટમાં ધમાકેદાર એન્ટ્રી કરી હતી. તે પોતાની કારમાંથી જ રાહદારીઓ પર અંધાધૂંધ ગોળીબાર કરી રહ્યો હતો, જેના કારણે મુખ્ય બજારમાં ભારે નાસભાગ મચી ગઈ હતી. આ અચાનક થયેલા હુમલામાં કેટલાક પોલીસ કર્મચારીઓ પણ ગંભીર રીતે ઈજાગ્રસ્ત થયા છે, જેઓ સ્થિતિ પર કાબૂ મેળવવાનો પ્રયાસ કરી રહ્યા હતા.
ઘટનાની ગંભીરતાને જોઈને ત્વરિત કાર્યવાહી કરતા ક્રાકો પોલીસ અને સુરક્ષા દળોએ હુમલાખોરને થોડે જ દૂર ઘેરી લીધો હતો. બંને પક્ષો વચ્ચે થયેલી સામસામેની ગોળીબારની અથડામણમાં હુમલાખોર પણ ઈજાગ્રસ્ત થયો હતો અને તેને પોલીસે ઝડપી લીધો હતો. શરૂઆતમાં મૃત્યુઆંક પાંચનો હતો, પરંતુ બાદમાં માલોપોલ્સ્કી પ્રાદેશિક સરકારે સત્તાવાર પુષ્ટિ કરતા મૃત્યુઆંક વધીને છ થયો હોવાનું જણાવ્યું હતું. પોલીસ તપાસ દરમિયાન હુમલાખોરની કારમાંથી મોટા પ્રમાણમાં અન્ય શસ્ત્રો અને દારૂગોળો પણ મળી આવ્યો છે, જે દર્શાવે છે કે તે કોઈ મોટા ષડયંત્રના ભાગરૂપે આવ્યો હતો. જોકે, પોલીસ પ્રવક્તા કતારઝીના સિસ્લોએ સ્પષ્ટ કર્યું છે કે આ હુમલો કોઈ મોટા જૂથ દ્વારા નહીં પરંતુ એક જ વ્યક્તિ દ્વારા કરવામાં આવ્યો હતો અને હાલ પરિસ્થિતિ સંપૂર્ણ નિયંત્રણ હેઠળ તથા સુરક્ષિત છે.
આ દુર્ઘટના બાદ સમગ્ર શહેરમાં ઇમરજન્સી સેવાઓ એલર્ટ કરી દેવામાં આવી હતી. ઘટનાસ્થળે એમ્બ્યુલન્સોનો કાફલો અને મેડિકલ રેસ્ક્યુ હેલિકોપ્ટર તૈનાત કરવામાં આવ્યા હતા. વાર્ષિક અંદાજે ૧૫ મિલિયન પ્રવાસીઓ આ મુખ્ય બજારની મુલાકાતે આવતા હોય છે, ત્યારે આ હુમલાથી આંતરરાષ્ટ્રીય સ્તરે પણ ચિંતા ફેલાઈ છે. પોલેન્ડના વડાપ્રધાન ડોનાલ્ડ ટસ્કે સમગ્ર ઘટનાની ઊંડી તપાસના આદેશ આપ્યા છે, જ્યારે રાષ્ટ્રપતિ કારોલ નાવ્રોક્કી અને પોલેન્ડમાં યુએસ એબેસેડર ટોમ રોઝ સહિતના વૈશ્વિક નેતાઓએ આ કાયરતાપૂર્ણ હુમલાની આકરી નિંદા કરી પીડિત પરિવારજનો પ્રત્યે ઊંડી સંવેદના વ્યક્ત કરી છે. પોલેન્ડ જેવા શાંત દેશમાં ભાગ્યે જ બનતી આવી માસ શૂટિંગની ઘટનાથી સમગ્ર રાષ્ટ્ર શોકમાં ડૂબી ગયું છે.
