ચેન્નાઈના નીલાંકરાઈ વિસ્તારમાં આવેલી કાપાલીશ્વર નગર સોસાયટીમાં મુખ્યમંત્રી વિજયના ઘરની પાછળના ભાગે આવેલા ફોર્થ મેઈન રોડ પરથી ગુરુવારે સવારે એક નવજાત શિશુના રોવાનો અવાજ સાંભળીને સ્થાનિક રહીીશો ચોંકી ઉઠ્યા હતા. નાગરિકોએ ત્યાં જઈને જોયું તો હજી નાળ પણ ન કપાયેલી હોય તેવી એક માસૂમ બાળકી રોઈ રહી હતી, જેને તરત જ પોલીસને જાણ કરવામાં આવી હતી. પોલીસે તાત્કાલિક ધોરણે સ્થળ પર પહોંચીને બાળકીનો કબ્જો મેળવ્યો હતો અને તેને પ્રાથમિક સારવાર માટે ખાનગી હોસ્પિટલ ખસેડી હતી, જ્યાંથી બાદમાં તેને એગ્મોર સ્થિત સરકારી ચાઇલ્ડ હેલ્થ ઇન્સ્ટિટ્યુટમાં રીફર કરવામાં આવી હતી. હાલમાં બાળકીની તબિયત સ્થિર છે અને ચાઇલ્ડ વેલફેર કમિટી દ્વારા તેની દેખરેખ માટે યોગ્ય વ્યવસ્થાઓ ગોઠવી દેવામાં આવી છે.
ઘટનાની ગંભીરતાને ધ્યાનમાં રાખીને નીલાંકરાઈ પોલીસે આસપાસના વિસ્તારોના સીસીટીવી ફૂટેજની સઘન ચકાસણી હાથ ધરી હતી, જેના આધારે પોલીસે નજીકમાં જ રહેતી ૩૪ વર્ષીય મહિલાની ઓળખ કરી લીધી હતી. પોલીસ પૂછપરછ દરમિયાન ચોંકાવનારી વિગતો બહાર આવી હતી કે આ મહિલા અગાઉ ફ્લાઇટ અટેન્ડન્ટ તરીકે નોકરી કરી ચૂકી છે અને તેણે બે દિવસ અગાઉ જ પોતાના ઘરે આ બાળકીને જન્મ આપ્યો હતો. પ્રાથમિક તપાસમાં જાણવા મળ્યું છે કે બાળકીના જન્મ બાદ તેના માતા-પિતાએ તેને સ્વીકારવાનો સ્પષ્ટ ઇનકાર કરી દીધો હતો, જેના કારણે ગભરાયેલી અને માનસિક તાણ અનુભવી રહેલી આ મહિલાએ પહેલા બાળકીને શ્મશાન ગૃહ પાસે છોડી દેવાનો વિચાર કર્યો હતો પરંતુ અંતે તેણે મુખ્યમંત્રીના ઘર પાસે રોડ પર તેને ત્યજી દીધી હતી.
પોલીસે આ મામલે કાયદેસરની કાર્યવાહી હાથ ધરીને સી.એસ.આર. (Community Service Register) નોંધી છે અને બાળકીની માતા તેમજ તેના મોડેથી અસ્વીકાર કરનાર માતા-પિતાની પણ ઊંડાણપૂર્વક પૂછપરછ શરૂ કરી છે. હાલ તો આ મહિલાની માનસિક સ્થિતિને ધ્યાનમાં રાખીને તેને વિશેષ કાઉન્સેલિંગ માટે મોકલવામાં આવી છે કારણ કે તેણે નવજાત બાળકીનો કબ્જો લેવાની પણ સ્પષ્ટ મનાઈ ફરમાવી દીધી છે. આ સમગ્ર ઘટનાએ સમગ્ર ચેન્નાઈ શહેરમાં ભારે હલચલ મચાવી દીધી છે અને સુરક્ષા તેમજ સામાજિક જવાબદારીને લઈને અનેક ગંભીર સવાલો પણ ઊભા કર્યા છે.
