અમેરિકન ગુપ્તચર અધિકારીઓએ ટ્રમ્પ વહીવટીતંત્રને એક અત્યંત સંવેદનશીલ મેમો દ્વારા માહિતગાર કર્યું છે કે વૈશ્વિક ટેકનોલોજી દિગ્ગજ 'એનવીડિયા' (Nvidia) કોર્પોરેશનના મુખ્ય કાર્યકારી અધિકારી જેન્સન હુઆંગ સાથે ઘનિષ્ઠ સંબંધો ધરાવતી એક મહિલા ખરેખર ચીનની ગુપ્તચર એજન્સી માટે કામ કરતી હતી. 'ન્યૂ યોર્ક ટાઈમ્સ' અને 'ફાયનાન્શિયલ ટાઈમ્સ'ના અહેવાલો મુજબ, મેગાસ્પીડ ઇન્ટરનેશનલ નામની એશિયન ટેક કંપનીની એક્ઝિક્યુટિવ એવી એલિસ હુઆંગની ગતિવિધિઓ પર અમેરિકી સર્વેલન્સ એજન્સીઓ દ્વારા નજર રાખવામાં આવી હતી. એવું માનવામાં આવે છે કે ચીનના મિનિસ્ટ્રી ઓફ સ્ટેટ સિક્યુરિટી દ્વારા જેન્સન હુઆંગ પાસેથી અમેરિકાના અત્યાધુનિક આર્ટિફિશિયલ ઇન્ટેલિજન્સ (AI) ચિપ્સ વિશે મહત્વપૂર્ણ માહિતી એકત્રિત કરવા અને ચીનને આ ચિપ્સ ઉપલબ્ધ કરાવવા માટે આ મહિલાની પસંદગી કરવામાં આવી હતી.
આ સમગ્ર પ્રકરણે અમેરિકન રાજકારણમાં ભારે ઉથલપાથલ મચાવી દીધી છે, ખાસ કરીને યુએસ મિડટર્મ ચૂંટણી બાદ પરિસ્થિતિ વધુ ગંભીર બની છે. હાઉસ સિલેક્ટ કમિટી ઓન ચાઇના દ્વારા તાજેતરમાં જ જેન્સન હુઆંગને એક પત્ર પાઠવીને બંધ બારણે યોજાનારી સંયુક્ત બેઠકમાં ઉપસ્થિત રહેવા અને સ્પષ્ટતા કરવા માટે જણાવાયું છે. કમિટી આ વાતચીતમાં જેન્સન હુઆંગ અને મેગાસ્પીડના અધિકારી એલિસ હુઆંગ વચ્ચેના સંબંધો તેમજ વિદેશી જાસૂસી સામે કંપનીની સુરક્ષા પ્રણાલીઓ અને પ્રોટોકોલ વિશે ઊંડાણપૂર્વક તપાસ કરવા માગે છે. અત્રે ઉલ્લેખનીય છે કે સિંગાપોર સ્થિત મેગાસ્પીડ કંપની એનવીડિયાના ક્લાઉડ પાર્ટનર નેટવર્કનો એક ભાગ છે, જે ચિપમેકર પાસેથી સાધનો ખરીદીને એઆઈ ડેવલપર્સને કમ્પ્યુટિંગ પાવર ભાડે આપે છે.
આ ગંભીર આક્ષેપો સામે આવતા જ એનવીડિયા કંપની દ્વારા સ્પષ્ટતા કરવામાં આવી છે કે તેમના ક્લાઉડ પાર્ટનર્સ ક્યારેય અમેરિકન કાયદામાં ફેરફાર કરવા કે ચીનને વેચાણ કરવા માટે દબાણ કરતા નથી. કંપનીએ વધુમાં જણાવ્યું હતું કે કોઈપણ વ્યક્તિ એનવીડિયાના ગ્રાહકો પાસેથી વર્ગીકૃત અથવા ગુપ્ત માહિતી મેળવવાનો પ્રયાસ કરશે તો તે નિષ્ફળ જશે, કારણ કે કંપની પોતાના ગ્રાહકો સાથે ક્યારેય આવી ગુપ્ત માહિતી શેર કરતી નથી. બીજી તરફ, જેન્સન હુઆંગે અગાઉ આપેલા એક ઇન્ટરવ્યુમાં મેગાસ્પીડ સાથેના પોતાના વ્યવહારોને સામાન્ય અને બિનઅસાધારણ ગણાવ્યા હતા અને ખાતરી આપી હતી કે તેમની કંપનીએ નિયમોનું ચુસ્તપણે પાલન કર્યું છે. તેમ છતાં, આ કથિત રોમેન્ટિક સંબંધ અને જાસૂસીના એંગલને કારણે આંતરરાષ્ટ્રીય સ્તરે ટેકનોલોજી અને રાષ્ટ્રીય સુરક્ષાનો મોટો મુદ્દો બની ગયો છે.
