ચેન્નાઈમાં તહેવારોની મોસમ શરૂ થતાં જ રોજિંદા મુસાફરો અને નોકરીયાત વર્ગ માટે મુસાફરી ભારે ખર્ચાળ બની ગઈ છે. એગ્રીગેટર એપ્સ પર ઓટો રિક્ષાના ભાડામાં એકાએક ૮૦ થી ૧০০ રૂપિયાનો વધારો જોવા મળ્યો છે. પરિસ્થિતિ એવી છે કે સવારના વ્યસ્ત સમયગાળા (પીક અવર્સ) દરમિયાન ઓટોની મુસાફરી કાર (કેબ) કરતા પણ વધુ મોંઘી સાબિત થઈ રહી છે. વિરુગામબક્કમમાં રહેતા અને ટી. નગર નોકરી માટે જતા એસ. ગીતા નામના મુસાફરે જણાવ્યું કે, ગયા અઠવાડિયા સુધી ૯.૩ કિલોમીટરના અંતર માટે ૧૭૫ રૂપિયા ભાડું થતું હતું, જે મંગળવારથી વધીને ૨૪૦ રૂપિયા થઈ ગયું છે જે કેબના ભાડાની લગભગ નજીક છે.
ઓટો ચાલકો આ ભાડા વધારા પાછળ તહેવારની મોસમ અને ભારે ટ્રાફિકને મુખ્ય કારણ ગણાવી રહ્યા છે. પરંતુ મુસાફરોની અસંતોષજનક ફરિયાદ છે કે એપ દ્વારા બતાવવામાં આવતા ભાડા ઉપરાંત પણ ઓટો ચાલકો ખરાબ રસ્તાઓ અને ટ્રાફિકનું બહાનું ધરીને વધારાના ૩૦ થી ૮૦ રૂપિયાની રોકડ માંગણી કરી રહ્યા છે. મુસાફરોના મતે, ભાડા વધારવા છતાં ઓટો ડ્રાઇવરોની વધારાના પૈસા પડાવવાની પેરવી બંધ થઈ નથી, જેના કારણે તહેવારની ખરીદી કરવા નીકળેલા સામાન્ય લોકોનું બજેટ ગરબડાઈ ગયું છે.
આ વધારો એવા સમયે સામે આવ્યો છે જ્યારે થોડા દિવસો પહેલા જ રાજ્ય સરકારે ઓટોના ભાડામાં બમણો વધારો કર્યો છે. સુધારેલા નવા દર મુજબ મુસાફરોએ પ્રથમ ૧.૮ કિલોમીટર માટે ૨૫ ને બદલે સીધા ૫૦ રૂપિયા ચૂકવવા પડે છે અને ત્યારબાદના પ્રત્યેક કિલોમીટરના ૨૫ રૂપિયા ચુકવવા પડે છે. આ સરકારી સુધારા પછી ચેન્નાઈ દેશભરમાં ઓટો મુસાફરી માટે સૌથી મોંઘા શહેરોમાં સ્થાન પામ્યું છે, અને તહેવારોના માહોલમાં આ નવું ભારણ સામાન્ય જનતા માટે મુશ્કેલ બની ગયું છે.
