ગુરૂવારે એક સમાચાર એજન્સી સાથે વાતચીત કરતી વખતે ઝારખંડ સરકારના મંત્રી અને જામતારાના ધારાસભ્ય ઇરફાન અંસારીએ કેન્દ્રની નરેન્દ્ર મોદી સરકાર સામે ગંભીર આક્ષેપો કર્યા હતા. તેમણે દાવો કર્યો હતો કે દેશના યુવાનો, ખેડૂતો અને લઘુમતી વર્ગમાં વર્તમાન શાસન પ્રત્યે ભારે અસંતોષ પ્રવર્તી રહ્યો છે. તાજેતરના યુવા-આંદોલનોનો ઉલ્લેખ કરતા તેમણે ચેતવણી આપી હતી કે જો વડાપ્રધાન સમયસર લોકોની ચિંતાઓ અને સમસ્યાઓનું નિરાકરણ નહીં લાવે, તો દેશના હાલ બાંગ્લાદેશ અને નેપાળ જેવા કથળેલી સ્થિતિ કરતા પણ બદતર થઈ શકે છે.
આ નિવેદન આપતી વખતે મંત્રી અંસારીએ કોંગ્રેસ નેતા રાહુલ ગાંધીનો ઉલ્લેખ કરીને એક નવો જ રાજકીય વિવાદ સર્જ્યો છે. તેમણે એવું પણ જણાવ્યું હતું કે જનતા માત્ર એક જ ઈશારાની રાહ જોઈ રહી છે અને તેઓ રાહુલ ગાંધીના આદેશ વગર કશું નહીં કરે. અંસારીના આ નિવેદનનો સીધો અર્થ એવો કાઢવામાં આવી રહ્યો છે કે રાહુલ ગાંધી જ આ રોષે ભરાયેલા યુવાનોને રસ્તા પર આવતા અટકાવી રહ્યા છે, જેણે રાજકીય વર્તુળોમાં ભારે હલચલ મચાવી દીધી છે.
મંત્રીના આ નિવેદન બાદ ભારતીય જનતા પાર્ટી (BJP) અત્યંત આક્રમક મુડમાં આવી ગઈ છે. ભાજપના નેતાઓએ ઇરફાન અંસારી પર આકરા પ્રહારો કરતા તેમના પર અરાજકતાની ભાષા બોલવાનો અને હિંસા ભડકાવવાનો ગંભીર આક્ષેપ કર્યો છે. ભાજપે સત્તાવાર રીતે આ નિવેદનને દેશ વિરોધી અને લોકશાહી વિરુદ્ધ ગણાવીને મંત્રી સામે તાત્કાલિક કાયદાકીય કાર્યવાહી કરવાની જોરદાર માંગ કરી છે, જેના કારણે આગામી દિવસોમાં આ મામલે રાજકીય ગરમાવો વધુ વધવાની પૂરી સંભાવના છે.
