તમિલનાડુ પોલીસના એન્ફોર્સમેન્ટ બ્યુરો સીઆઈડી દ્વારા રાજ્યના ૩૮ જિલ્લાઓ અને ૯ મોટા શહેરોમાં એક સાથે એક વિશાળ અને સંકલિત ડ્રગ વિરોધી અભિયાન હાથ ધરવામાં આવ્યું હતું. મંગળવારે યોજાયેલા આ સઘન ઓપરેશન દરમિયાન પોલીસે કુલ ૨૮૩ કેસ નોંધીને ૩૪૪ વ્યક્તિઓની ધરપકડ કરી છે. આ કાર્યવાહીમાં પોલીસ દ્વારા ૨૪૨.૨ કિલોગ્રામ ગાંજા, ૧૯.૮ કિલોગ્રામ હેશીશ, ૧૨.૨૯૮ કિલોગ્રામ અન્ય નશીલા પદાર્થો અને ૨,૧૪૩ જેટલી પ્રતિબંધિત ટેબ્લેટ્સ જપ્ત કરવામાં આવી છે. આ ઉપરાંત, અગાઉથી નાસતા-ફરતા ૬૪ આરોપીઓની ધરપકડ કરવાની સાથે ૪૪ બિનજામીનપાત્ર વોરંટ પણ સફળતાપૂર્વક અમલમાં મૂકવામાં આવ્યા છે.
યુવાધનને નશાના રવાડે ચઢતું અટકાવવા માટે પોલીસ પ્રશાસને શૈક્ષણિક સંસ્થાઓ અને હોસ્ટેલને ખાસ નિશાન બનાવીને સઘન તપાસ હાથ ધરી હતી. વિશેષ પોલીસ ટીમો દ્વારા શૈક્ષણિક સંસ્થાઓની આસપાસના ૧,૩૬૭ સંવેદનશીલ વિસ્તારો સહિત કુલ ૩,૨૪૨ ડ્રગ હોટસ્પોટ્સનું નિરીક્ષણ કરવામાં આવ્યું હતું અને ૮૯૦ વિદ્યાર્થી હોસ્ટેલમાં અચાનક સરપ્રાઈઝ ચેકિંગ કરવામાં આવ્યું હતું. ઉત્તર-પૂર્વ રાજ્યોમાંથી આવતી ૩૫૭ ટ્રેનોની સઘન ચકાસણી દરમિયાન એક જ ટ્રેનમાંથી ૧૦૪.૩૬૧ કિલોગ્રામ ગાંજાનો જથ્થો ઝડપાઈ આવ્યો હતો. આ ઉપરાંત, રાજ્યની સરહદી ચેકપોસ્ટ પર ૨૩,૭૪૪ વાહનોનું ચેકિંગ કરી ગુટકા, દારૂ અને ગાંજા સાથે સંકળાયેલા ૬૨ નવા કેસ નોંધવામાં આવ્યા છે.
આ અભિયાન માત્ર ધરપકડ પૂરતું મર્યાદિત ન રહેતા ગુનેગારોની આર્થિક કમર તોડવા સુધી લંબાવવામાં આવ્યું છે, જેના ભાગરૂપે ૧,૭૭૦ એનડીપીએસ (NDPS) કેસોમાં તપાસ પૂર્ણ કરવામાં આવી છે અને ૮૦૪ કેસોમાં આરોપીઓની મિલકતો તેમજ બેંક ખાતા સીઝ કરવાની પ્રક્રિયા પણ શરૂ કરી દેવામાં આવી છે. ડ્રગ્સના આ ગેરકાયદેસર કારોબારને ડામવા માટે સામાન્ય જનતા પણ સહયોગ આપી શકે તે માટે પોલીસે હેલ્પલાઈન નંબર ૧૦૫૮૧ અને વોટ્સએપ નંબર ૯૪૯૮૪ ૧૦૫૮૧ જાહેર કર્યા છે, જેના પર નાગરિકો ડ્રગ તસ્કરી અંગેની માહિતી ગુપ્ત રીતે આપી શકે છે.
