આર્ટિફિશિયલ ઇન્ટેલિજન્સ ક્ષેત્રની દિગ્ગજ કંપની ઓપનએઆઈના મુખ્ય કાર્યકારી અધિકારી (સીઈઓ) સેમ અલ્ટમાને હાલમાં જ એક પોડકાસ્ટ દરમિયાન જણાવ્યું હતું કે ચેટજીપીટીના વપરાશકર્તાઓની બાબતમાં ભારતે અમેરિકાને પણ પાછળ છોડી દીધું છે. આજે ભારત દુનિયાભરમાં ઓપનએઆઈ માટે સૌથી મોટું બજાર બની ગયું છે, જે અત્યંત ઝડપથી આગળ વધી રહ્યું છે. અલ્ટમાને ભારત અને અમેરિકાના યુઝર્સના અભિગમ વચ્ચેનો તફાવત સ્પષ્ટ કરતા જણાવ્યું કે જ્યાં એક તરફ અમેરિકામાં એઆઈ પ્રત્યે થોડી નકારાત્મકતા કે શંકાની નજર જોવા મળે છે, તો બીજી તરફ ભારતમાં ટેક્નોલોજી પ્રત્યે અસાધારણ સકારાત્મક અને ઉત્સાહી વાતાવરણ પ્રવર્તી રહ્યું છે.
ભારતીય યુઝર્સ વિશે વાત કરતા અલ્ટમાને અહીંના લોકોની 'બિલ્ડર એનર્જી' એટલે કે કંઈક નવું સર્જન કરવાની ઊર્જાના ભરપૂર વખાણ કર્યા હતા. ભારતના યુગવાનો, વિદ્યાર્થીઓ અને ઉદ્યોગસાહસિકો માત્ર સામાન્ય વાતોચીતો કે પ્રશ્નો પૂછવા પૂરતા ચેટજીપીટી મર્યાદિત નથી રાખતા, પરંતુ તેનો ઉપયોગ વ્યવસાયો શરૂ કરવા, જટિલ સમસ્યાઓ ઉકેલવા અને રોજિંદા કાર્યોને સરળ બનાવવા માટે કરી રહ્યા છે. તેમણે એક પ્રેરણાદાયક ઉદાહરણ આપતા જણાવ્યું કે કેવી રીતે એક સામાન્ય ભારતીય વિદ્યાર્થીએ ક્યારેય ફંડરેસિંગ ન કર્યું હોવા છતાં, ઓપનએઆઈના ટૂલ્સની મદદથી પોતાની સ્કૂલ માટે સફળતાપૂર્વક આખી ફંડરેસિંગ પ્રક્રિયા પાર પાડી હતી. આ પ્રકારના વ્યવહારુ ઉપયોગો દર્શાવે છે કે ભારતીય યુવાનો આ ટેક્નોલોજીનો મહત્તમ લાભ ઉઠાવવા માટે કેટલા સજ્જ છે.
વિશ્વના સૌથી મોટા ઇન્ટરનેટ બજારોમાંના એક તરીકે ભારતનું મહત્વ હવે ઓપનએઆઈ માટે ખૂબ જ વધી ગયું છે. અલ્ટમાને નોંધ્યું કે અમેરિકન લોકો ભલે ટેક્નોલોજીનો ઉપયોગ કરતા હોય, પરંતુ જાહેરમાં અભિવ્યક્ત થતી તેમની પ્રાથમિકતાઓ અને મંતવ્યોમાં એઆઈ પ્રત્યેનો ડર કે સાવચેતી વધુ જોવા મળે છે, જેની સરખામણીમાં ભારતીયોનો ઉત્સાહ બિલકુલ અલગ અને પ્રેરણાદાયક છે. ભારતમાં એઆઈ ટેક્નોલોજીનો આ વ્યાપક સ્વીકાર માત્ર એક ટ્રેન્ડ નથી, પરંતુ તે દેશના યુવાનો અને વ્યવસાયો દ્વારા નવી તકો ઊભી કરવા અને ભવિષ્યના વિકાસને આકાર આપવાની દિશામાં એક મોટું પગલું સાબિત થઈ રહ્યું છે.
