તમિલનાડુ સરકારે મંગળવારે 'તમિલનાડુ સિનેમા (રેગ્યુલેશન) રૂલ્સ, ૧૯૫૭' માં મહત્વપૂર્ણ સંશોધન કરતા સિનેમાઘરો માટે રાહતના મોટા સમાચાર આપ્યા છે. હવેથી નવી રિલીઝ થતી તમિલ ફિલ્મોના પહેલા અઠવાડિયા દરમિયાન સિનેમાઘરો દિવસમાં કુલ છ શો ચલાવી શકશે. આ નવા નિયમ અનુસાર થિયેટરો સવારે ૬ વાગ્યાથી શરૂ કરીને બીજા દિવસના સવારના ૨:૩૦ વાગ્યા સુધી ફિલ્મોનું પ્રદર્શન કરી શકશે. સરકારના આ નિર્ણયથી લાંબા સમયથી સવારના ખાસ શોની રાહ જોઈ રહેલા દર્શકોની મુવી જોવાની મજા બમણી થઈ જશે અને થિયેટર માલિકોમાં પણ વ્યાપારી ઉત્સાહ પાછો ફર્યો છે.
અગાઉની ડીએમકે સરકારે વર્ષ ૨૦૨૩માં અભિનેતા અજીતકુમારની ફિલ્મ 'થુનિવું' ના પ્રીમિયર સમયે ઉજવણી દરમિયાન થયેલી એક દુર્ઘટના બાદ કાયદો અને વ્યવસ્થાયી સ્થિતિને ધ્યાનમાં રાખીને સવારના વહેલા શો પર પ્રતિબંધ મૂક્યો હતો. જો કે, તમિલ ફિલ્મ એક્ટિવ પ્રોડ્યુસર્સ એસોસિએશન, પ્રોડ્યુસર્સ કાઉન્સિલ અને થિયેટર ઓનર્સ એસોસિએશન દ્વારા મુખ્યમંત્રી સી. જોસેફ વિજય સમક્ષ રજૂઆતો કરવામાં આવી હતી, જેના આધારે આ પ્રતિબંધ હટાવવામાં આવ્યો છે. રાજ્ય સરકારે માત્ર નવી ફિલ્મોના પ્રથમ સપ્તાહ માટે જ નહીં, પરંતુ સ્થાનિક તહેવારો, જાહેર રજાઓ તેમજ શનિવાર અને રવિવારના દિવસે પણ છ શો યોજવાની છૂટ આપી છે.
ઉદ્યોગના નિષ્ણાતો અને નિર્માતાઓએ સરકારના આ ડગલાને વધાવ્યો છે કારણ કે અગાઉ અન્ય રાજ્યો અને વિદેશોમાં વહેલી સવારે ફિલ્મો રિલીઝ થવાના કારણે સોશિયલ મીડિયા પર સમીક્ષાઓ આવી જતી હતી, જેનાથી સ્થાનિક બોક્સઓફિસ પર અસર પડતી હતી. હવે આ સમાન તક મળવાથી તમિલ ફિલ્મો વૈશ્વિક સ્તરે એક જ સમયે દર્શકો સુધી પહોંચી શકશે. સરકારના આ સકારાત્મક પગલાથી ફિલ્મ ઉદ્યોગને નવો વેગ મળશે અને રાજ્યના મનોરંજન ક્ષેત્રમાં મોટો આર્થિક ઉછાળો જોવા મળશે તેવી પૂરી આશા વ્યક્ત કરવામાં આવી રહી છે.
