મુંબઈમાં વધતા જતા વાયુ અને અવાજ પ્રદૂષણને ધ્યાનમાં રાખીને બોમ્બે હાઈકોર્ટના નિર્દેશો અનુસાર બૃહમુંબઈ મ્યુનિસિપલ કોર્પોરેશન (બીએમસી) દ્વારા ઇકો-ફ્રેન્ડલી અને ફટાકડા મુક્ત દિવાળી અભિયાન ચલાવવામાં આવી રહ્યું છે. આ જ જાગૃતિ અભિયાનના ભાગરૂપે અભિનેત્રી દીયા મિર્ઝાએ એક વીડિયો બનાવ્યો હતો, જેમાં તેમણે નાગરિકોને પ્રદૂષણથી દૂર રહેવા અપીલ કરી હતી. જો કે, સોમવારે કેટલાક રાજકીય નેતાઓના વિરોધ અને વિવાદાસ્પદ ટિપ્પણીઓને કારણે બીએમસીએ દબાણમાં આવીને સોશિયલ મીડિયા પરથી દીયા મિર્ઝાની આ ક્લિપ હટાવી દીધી હતી, જ્યારે માધુરી દીક્ષિત અને અજિંક્ય રહાણે જેવા અન્ય સેલિબ્રિટીઝના વીડિયો યથાવત રાખવામાં આવ્યા હતા.
આ મામલાની ગંભીરતાને સમજીને જસ્ટિસ ગિરીશ કુલકર્ણી અને જસ્ટિસ નીલા ગોખલેની બેન્ચે સ્વમેળે (suo motu) આ કેસની સુનાવણી હાથ ધરી હતી અને ભારે વેદના વ્યક્ત કરી હતી. અદાલતે આકરી ટીપ્પણી કરતા જણાવ્યું હતું કે કેટલાક લોકો અને જનપ્રતિનિધિઓની આ 'સંકુચિત માનસિકતા' અત્યંત દુર્ભાગ્યપૂર્ણ છે. પર્યાવરણ અને પ્રદૂષણ જેવા સાર્વત્રિક મુદ્દાને બિનજરૂરી રીતે ધાર્મિક રંગ આપવામાં આવ્યો છે, જે દેશની ધર્મનિરપેક્ષ ભાવનાની વિરુદ્ધ છે. કોર્ટે સ્પષ્ટપણે કહ્યું કે પ્રચાર માટે કયા સેલિબ્રિટીની પસંદગી કરવી તે સંપૂર્ણપણે સત્તાવાળાઓનો નિર્ણય છે અને કોઈ વ્યક્તિ કે નેતા આ બાબતે સવાલ ઉઠાવી શકે નહીં.
હાઈકોર્ટે બીએમસીની ઝટપટ નિર્ણયો લેવાની પદ્ધતિની પણ ઝાટકણી કાઢી હતી અને કહ્યું કે તંત્ર દ્વારા વીડિયો હટાવવો એ અયોગ્ય પ્રતિક્રિયા હતી. કોર્ટે ભારપૂર્વક જણાવ્યું કે હવા કોઈ ધર્મ કે જાતિ જોઈને શ્વાસમાં નથી લેવાતી, પર્યાવરણની રક્ષા કરવી એ દરેક નાગરિકની ફરજ છે અને આપણો દેશ વિવિધતામાં એકતાની ભાવનાથી ચાલે છે. અદાલતે આદેશ આપ્યો છે કે તાત્કાલિક ધોરણે દીયા મિર્ઝાની હટાવવામાં આવેલી ક્લિપને ફરીથી સોશિયલ મીડિયા પર અપલોડ કરવામાં આવે જેથી સમાજમાં યોગ્ય સંદેશ જઈ શકે.
