સોશિયલ મીડિયા પ્લેટફોર્મ 'એક્સ' (X) પર હાલમાં ટેક્નોલોજી જગતના દિગ્ગજોની ખાણીપીણીની આદતોને લઈને એક રસપ્રદ ચર્ચાએ જોર પકડ્યું છે. ફ્રીસ્ટાઇલ ક્લાઉડના સહ-સ્થાપક અને સીઈઓ બેન સ્વેર્ડલોવે એક વાયરલ પોસ્ટમાં એવું ધ્યાન દોર્યું હતું કે ઓપનએઆઈના સીઈઓ સેમ ઓલ્ટમેન, એન્થ્રોપિકના સીઈઓ ડેરિયો અમોડેઈ અને ગુગલના સુંદર પિચાઈ જેવા દુનિયાના અગ્રણી AI નેતાઓ શાકાહારી છે. તેમણે મજાકમાં એવું અનુમાન લગાવ્યું કે કદાચ આ જ શાકાહારી આહાર તેમની અદ્ભુત સફળતાનું રહસ્ય હોઈ શકે છે. આ પોસ્ટ સામે આવતાની સાથે જ સોશિયલ મીડિયા પર યુઝર્સ વચ્ચે ખાણીપીણી અને સફળતાના સંબંધો અંગે હળવાશથી મંતવ્યો અને મસ્તીનો દોર શરૂ થઈ ગયો હતો.
આ વાયરલ પોસ્ટ પર ટેસ્લા અને સ્પેસએક્સના વડા એલન મસ્ક ક્યાં પાછળ રહેવાના હતા? તેમણે પોતાની આગવી અને મૌલિક શૈલીમાં આ દાવાને ફગાવતા એકદમ 'હેવી' અને મજેદાર જવાબ આપ્યો હતો. મસ્કે પ્રતિક્રિયા આપતા લખ્યું કે તેઓ દરરોજ સવારે નાસ્તામાં સ્ટેક (બીફ), ઈંડા અને કોફી લે છે અને સાથે મજબૂતી દર્શાવતો ઇમોજી પણ શેર કર્યો હતો. એલન મસ્કની આ ટ્વીટ વાગતાની સાથે જ વાયરલ થઈ ગઈ હતી અને તેને લાખો લાઈક્સ તેમજ હજારો કોમેન્ટ્સ મળી હતી. અગાઉ પણ એક પોડકાસ્ટમાં મસ્કે જણાવ્યું હતું કે તેઓ સામાન્ય રીતે લંચ કરવાનું ટાળે છે અને ડિનર દિવસ પ્રમાણે અલગ-અલગ હોય છે, જે સાબિત કરે છે કે તેમની દિનચર્યા શાકાહારી નેતાઓથી બિલકુલ અલગ છે.
વાસ્તવમાં આ ટેક્નોલોજી દિગ્ગજોના આહારની વાત કરીએ તો સેમ ઓલ્ટમેન બાળપણથી જ શાકાહારી છે, જ્યારે સુંદર પિચાઈ પણ શાકાહારી છે પરંતુ પ્રોટીન માટે પોતાના ડાયટમાં ઈંડાનો સમાવેશ કરે છે. ડેરિયો અમોડેઈ પણ પોતાની બહેનથી પ્રેરિત થઈને શાકાહારી બન્યા હતા. બીજી તરફ, મેટાના માર્ક ઝુકરબર્ગ પણ માંસાહારી ખોરાક માટે જાણીતા છે, જેઓ એઆઈ ક્ષેત્રમાં આ કંપનીઓ સાથે સીધી સ્પર્ધા કરે છે. વૈજ્ઞાનિક કે તાર્કિક દૃષ્ટિએ ખોરાક અને AI કંપનીઓની સફળતા વચ્ચે કોઈ સીધો સંબંધ હોવાના કોઈ પુરાવા નથી, પરંતુ આ ચર્ચાએ સોશિયલ મીડિયા યુઝર્સને દુનિયાના સૌથી શક્તિશાળી ટેક લીડર્સની જીવનશૈલીની તુલના કરવાની એક રમુજી તક ચોક્કસ પૂરી પાડી છે.
