નવી દિલ્હી ખાતે કોંગ્રેસ અધ્યક્ષ મલ્લિકાર્જુન ખડગેના સરકારી નિવાસસ્થાને આયોજિત આ મોક પાર્લામેન્ટનું વાતાવરણ જૂની સંસદ ભવનના સેન્ટ્રલ હોલ જેવું પ્રભાવશાળી રહ્યું હતું. ૮૧ વર્ષીય પૂર્વ લોકસભા સ્પીકર મેઇરા કુમારે ગૃહના અધ્યક્ષ તરીકે બેસીને સત્રનું સંચાલન કર્યું હતું. સત્રની શરૂઆતમાં માઈક બંધ હોવા જેવી નાની અડચણ આવી હતી, પરંતુ તેને ઝડપથી સુધારી લેવામાં આવી હતી. ત્યારબાદ તેમણે પોતાના આગવા અને પ્રભાવશાળી અંદાજમાં સત્રના એજન્ડાની જાહેરાત કરી હતી અને લોકશાહીમાં મતદારના મહત્ત્વ પર ભાર મૂક્યો હતો.
આ મોક સત્ર દરમિયાન મુખ્ય ચૂંટણી કમિશનર (CEC) ગ્ઞાનેશ કુમાર સામે 'મહાભિયોગ' ચલાવવાનો પ્રસ્તાવ રજૂ કરવામાં આવ્યો હતો. મલ્લિકાર્જુન ખડગેએ આ પ્રસ્તાવ રજૂ કરી કમિશનર પર ગંભીર આરોપો મૂક્યા હતા. અધ્યક્ષ સ્થાને બેઠેલા મેઇરા કુમારે કડક શબ્દોમાં જણાવ્યું હતું કે, જો ચૂંટણી પ્રણાલીમાં ખામી સર્જાય તો આપણે યુવા પેઢીને ઉજ્જવળ ભવિષ્યનું વચન કેવી રીતે આપી શકીએ? તેમણે દેશની લોકશાહીની તુલના વડના વૃક્ષ સાથે કરી હતી અને તેના રક્ષણ માટે કડક પગલાં લેવાની જરૂરિયાત પર ભાર મૂક્યો હતો.
સત્રના સંચાલન દરમિયાન મેઇરા કુમારની જૂની શૈલી અકબંધ જોવા મળી હતી. નિર્ધારિત સમય કરતાં વધુ સમય બોલનાર નેતાઓને તેમના જાણીતા અંદાજમાં 'બાથ જાઈએ' (બેસી જાઓ) કહીને રોક્યા હતા અને સમય મર્યાદાનું પાલન કરવા બદલ આભાર પણ વ્યક્ત કર્યો હતો. રસપ્રદ વાત એ છે કે આ સત્રમાં તેમણે જે ખુરશી પર બેસીને કાર્યવાહી ચલાવી હતી, તે ઐતિહાસિક ખુરશી દેશના પ્રથમ વડાપ્રધાન જવાહરલાલ નેહરુની હતી. સમગ્ર સત્ર દરમિયાન તેમની ન્યાયપ્રિય અને શિસ્તબદ્ધ અધ્યક્ષતાએ સૌનું ધ્યાન ખેંચ્યું હતું.
