પટના ખાતે ભાજપ કાર્યાલયમાં પત્રકારો સાથે વાતચીત કરતા ભારતીય જનતા પાર્ટીના સાંસદ અને પૂર્વ કેન્દ્રીય મંત્રી રવિશંકર પ્રસાદે કોંગ્રેસ અને ઇન્ડિયા બ્લોક પર આકરા પ્રહારો કર્યા હતા. તેમણે મુખ્ય ચૂંટણી કમિશનર જ્ઞાનેશ કુમાર વિરુદ્ધ વિપક્ષી ગઠબંધન દ્વારા યોજાયેલા સાંકેતિક 'પબ્લિક ઇમ્પીચમેન્ટ' અને મોક પાર્લામેન્ટની ટીકા કરતા જણાવ્યું હતું કે, જે સંસદમાં માત્ર વિપક્ષ હાજર હોય અને સત્તાધારી પક્ષ ગેરહાજર હોય તેવી મોક પાર્લામેન્ટનો શું અર્થ? વિપક્ષી નેતાઓ સંસદની કાર્યવાહીમાં અવરોધ ઊભો કરે છે અને આ પ્રકારે મોક પાર્લામેન્ટ યોજીને દેશની જનતાની મજાક ઉડાવી રહ્યા છે. વધુમાં, તેમણે સરદાર વલ્લભભાઈ પટેલની ૧૫૧મી જન્મજયંતિના દિવસે જ આ પ્રકારનું આયોજન કરવા બદલ કોંગ્રેસ પર સરદાર સાહેબના અપમાનનો પણ ગંભીર આરોપ મૂક્યો હતો.
આ પ્રસંગે વિવાદાસ્પદ નિવેદન આપતા રવિશંકર પ્રસાદે દાવો કર્યો હતો કે વર્ષ ૧૯૪૭માં મોટાભાગની કોંગ્રેસ સમિતિએ વડાપ્રધાન પદ માટે સરદાર પટેલના નામનો પ્રસ્તાવ મૂક્યો હતો, પરંતુ મહાત્મા ગાંધીના દબાણને કારણે તેમને ખસી જવું પડ્યું હતું અને જવાહરલાલ નેહરુ 'વોટ ચોરી' કરીને દેશના વડાપ્રધાન બન્યા હતા. તેમણે એમ પણ કહ્યું હતું કે કેટલા કોંગ્રેસી નેતાઓ પોતાની યોગ્યતાના બળે વડાપ્રધાન બન્યા તે એક ખુલ્લું રહસ્ય છે. રાહુલ ગાંધીને 'બિનજવાબદાર' અને 'છદ્મ રાજકારણી' ગણાવતા તેમણે પડકાર ફેંક્યો હતો કે જો કોંગ્રેસને ચૂંટણી પ્રક્રિયા પર શંકા હોય, તો રાહુલ ગાંધી અને તેમના ધારાસભ્યોએ રાજીનામું આપી દેવું જોઈએ. ચૂંટણી પરિણામો અંગે તેમણે કટાક્ષ કર્યો હતો કે જ્યારે પરિણામ કોંગ્રેસની તરફેણમાં આવે ત્યારે ચૂંટણી પંચ સાચું લાગે છે, પરંતુ હાર થતાં જ તેની ટીકા કરવી શરમજનક છે.
રવિશંકર પ્રસાદે કોંગ્રેસ પર બંધારણીય સંસ્થાઓ જેવી કે ચૂંટણી પંચ, સર્વોચ્ચ અદાલત અને સૈન્યને નબળી પાડવાનો આરોપ લગાવતા જણાવ્યું હતું કે વિપક્ષી નેતાઓ વિદેશી શક્તિઓના દબાણ હેઠળ ભારતની લોકશાહી વ્યવસ્થાને નબળી કરવા માટે કામ કરી રહ્યા છે. જનસમર્થન ગુમાવી ચૂકેલી કોંગ્રેસ પાર્ટી સતત ચૂંટણીઓમાં હારનો સામનો કરી રહી છે તેવું કહીને તેમણે ભવિષ્યની ચૂંટણીઓ અંગે દાવો કર્યો હતો કે ઉત્તર પ્રદેશની ૨૦૨૭ની વિધાનસભા ચૂંટણીમાં જનતા સમાજવાદી પાર્ટીને અને ૨૦૨૯ની લોકસભા ચૂંટણીમાં કોંગ્રેસને સંપૂર્ણપણે નકારી કાઢશે.
