ગુજરાત ટેકનોલોજિકલ યુનિવર્સિટી (GTU) માં પીએચડી (PhD) ડિગ્રીના માર્ગદર્શક અને શૈક્ષણિક પ્રક્રિયાની ગરિમાને ઠેસ પહોંચાડતો એક મોટો કૌભાંડનો મારો સામે આવ્યો છે. યુનિવર્સિટીના પ્રોફેસર ડો. મનીષ ઠક્કર પર ગંભીર આક્ષેપો મૂકવામાં આવ્યા છે કે તેમણે પીએચડી રિસર્ચ સ્કોલર્સની થિસિસને મંજૂરી આપવા માટે શૈક્ષણિક ધોરણો અને નિયમોને વેંચી દીધા છે. આ મામલે સીધી જ યુનિવર્સિટી ગ્રાન્ટ્સ કમિશન (UGC) ના વિજિલન્સ વિભાગમાં સત્તાવાર ફરિયાદ દાખલ કરવામાં આવતા રાજ્યના શિક્ષણ જગતમાં ભારે ખળભળાટ મચી ગયો છે. દિલ્હી સુધી પહોંચેલા આ પ્રકરણે જીટીયુની આંતરિક વહીવટી પારદર્શિતા સામે ગંભીર સવાલો ખડા કર્યા છે.
યુજીસીના અત્યંત કડક નિયમો સ્પષ્ટપણે જણાવે છે કે કોઈપણ પીએચડી સ્કોલરે પોતાની અંતિમ થિસિસ જમા કરાવતા પૂર્વે કોઈ માન્ય અને હાલમાં એક્ટિવ હોય તેવી રિસર્ચ જર્નલમાં પોતાનું પેપર પ્રકાશિત કરાવવું અનિવાર્ય છે. જોકે, આ પ્રકરણમાં જે હકીકતો બહાર આવી છે તે અત્યંત ચોંકાવનારી છે. જે જર્નલ પહેલેથી જ કાયદેસર રીતે બંધ થઈ ચૂકી હતી, તેમાં રિસર્ચ પેપર પ્રકાશિત કરવામાં આવ્યું હોવાનું સામે આવ્યું છે. એટલું જ નહીં, પેપરના મૂળ પ્રકાશનનું વર્ષ ૨૦૨૨ હોવા છતાં વેબસાઇટ પર તેની વિગતો બદલીને વર્ષ ૨૦૨૪ દર્શાવવામાં આવી છે. નિયમોની મર્યાદામાં થિસિસને બેસાડવા માટે દસ્તાવેજો અને તારીખો સાથે જાણીજોઈને ગેરકાયદે છેડછાડ કરવામાં આવી હોવાની પ્રબળ આશંકા વ્યક્ત કરાઈ રહી છે.
કોઈપણ રિસર્ચ સ્કોલર બોગસ કે માન્યતા ગુમાવી ચૂકેલી જર્નલના આધારે પીએચડી જેવી ઉચ્ચ ડિગ્રી મેળવી શકે નહીં અને તેની ચકાસણી કરવાની મુખ્ય જવાબદારી માર્ગદર્શક પ્રોફેસરની હોય છે. પ્રોફેસર ડો. મનીષ ઠક્કર દ્વારા આ સમગ્ર કૌભાંડમાં આંખ આડા કાન કરીને થિસિસને મંજૂરી અપાઈ હોવાના આક્ષેપોથી શૈક્ષણિક વર્તુળોમાં ફિટકાર વરસી રહ્યો છે. યુજીસીના વિજિલન્સ વિભાગે આ ગંભીર ફરિયાદને ધ્યાને લઈને પ્રાથમિક તથ્યોની ચકાસણીનો ધમધમાટ શરૂ કરી દીધો છે. જો તપાસમાં આ તમામ આરોપો સાબિત થશે, તો સંબંધિત પ્રોફેસર સામે કડક ખાતાકીય પગલાં લેવા ઉપરાંત સંબંધિત સ્કોલરની પીએચડી માન્યતા રદ થવાની પણ પૂરી સંભાવના છે, જેના કારણે યુટીયુ તંત્ર પર પણ સવાલોના ઘેરા વધી ગયા છે.
