અલીયાબાડા પંથકમાં ચાલુ વર્ષે ઓછો વરસાદ થવાને કારણે ઊભી થયેલી પાણીની અછત અને પિયતના પ્રશ્નોના કાયમી નિવારણ માટે એક વિશેષ બેઠકનું આયોજન કરવામાં આવ્યું હતું. જળક્રાંતિ ટ્રસ્ટ, રાજકોટના જળસેવક મનસુખભાઈ સુવાગીયાના માર્ગદર્શન હેઠળ યોજાયેલી આ બેઠકમાં અલીયા, બાડા, મોડા અને સૂર્યપરા ગામના સરપંચો, અગ્રણીઓ તેમજ બહોળી સંખ્યામાં ખેડૂતોએ ઉત્સાહભેર ભાગ લીધો હતો. દુષ્કાળ જેવી સ્થિતિને પહોંચી વળવા અને જમીનમાં પાણીના સ્ત્રોત વધારવા માટે ગ્રામીણ સ્તરે સઘન આયોજન કરવાનો મુખ્ય હેતુ હતો.
આ બેઠક બાદ મનસુખભાઈ સુવાગીયા દ્વારા સૂર્યપરા, મોડા, અલીયા અને બાડા ગામના ખેતીવાડી તથા નદી વિસ્તારની પ્રત્યક્ષ મુલાકાત લઈને સર્વે કરવામાં આવ્યો હતો. પરિસ્થિતિની ગંભીરતા સમજીને તાત્કાલિક ધોરણે નવા ચેકડેમનું કામ શરૂ કરવા માટે ગ્રામજનો અને ખેડૂતોએ લોકફાળો એકત્ર કરીને શક્તિ મુજબની મદદ કરવાનો સંકલ્પ લીધો હતો. ખાસ કરીને ચાલુ વર્ષની દુષ્કાળની સ્થિતિને ધ્યાનમાં રાખીને તમામ સામાજિક અને બિનઉત્પાદક ખર્ચાઓ ઘટાડીને બચેલી રકમ પાણી સંગ્રહ અને ચેકડેમ નિર્માણ પાછળ વાપરવાનો પ્રશંસનીય નિર્ણય લેવાયો હતો. સાથે જ ખેડૂતોને ઓર્ગેનિક ખેતી, ગાય આધારિત ખેતી અને પશુપાલન અંગે માર્ગદર્શન આપીને જાપાન તથા ઈઝરાઈલ જેવા દેશોની કૃષિ પદ્ધતિઓની માહિતી આપવામાં આવી હતી.
આ સમગ્ર આયોજનમાં અલીયાના સરપંચ અલ્પેશભાઈ મકવાણા, બાડાના સરપંચ જયપાલસિંહ જાડેજા, મોડાના સરપંચ નરેન્દ્રસિંહ જાડેજા, સૂર્યપરાના સરપંચ મુકેશભાઈ મૂંગરા તેમજ બેંક ઓફ બરોડાના નિવૃત્ત સિનિયર મેનેજર અને પ્રગતિશીલ ખેડૂત ભીમજીભાઈ બી. નળિયાપરાએ સક્રિય સહયોગ આપ્યો હતો. ગામડાઓમાં જળસંચયની સાથે સમાજમાંથી વ્યસનો દૂર કરી રોગમુક્ત સમાજ બનાવવાની પણ અપીલ કરાઈ હતી. આ લોકભાગીદારીના માધ્યમથી પંથકમાં જળસંચય ક્ષેત્રે જનજાગૃતિનું ઉત્તમ ઉદાહરણ પૂરું પાડવામાં આવ્યું છે, જે ભવિષ્યમાં ખેડૂતો માટે રાહતરૂપ સાબિત થશે.
