દેવભૂમિ દ્વારકા જિલ્લાના ખેડૂતો માટે રાસાયણિક ખાતર અને જંતુનાશકોથી દૂર રહીને ઓર્ગેનિક કે સેન્દ્રિય ખેતી અપનાવવાનો ઉત્તમ મોકો આવી ગયો છે. રાજ્ય સરકાર દ્વારા વર્ષ ૨૦૨૬-૨૭ માટે ખેતીવાડી શાખાની વિવિધ યોજનાઓ અમલમાં મૂકવામાં આવી છે, જેના ભાગરૂપે સેન્દ્રિય ખેતીના ૨ ખાસ ઘટકોમાં ખેડૂતોને આર્થિક સહાય પૂરી પાડવામાં આવશે. આ માટે જિલ્લાના જે પણ ખેડૂતો સહાય મેળવવા ઈચ્છતા હોય તેમણે ઓનલાઈન આઈ-ખેડૂત પોર્ટલ પર જઈને સમયસર રજીસ્ટ્રેશન કરાવી લેવા માટે જિલ્લા ખેતીવાડી અધિકારી દ્વારા ખાસ અનુરોધ કરવામાં આવ્યો છે.
આ યોજના અંતર્ગત સેન્દ્રિય ખેતીના રજીસ્ટ્રેશન, ઇન્સ્પેક્શન, સર્ટિફિકેશન અને ટ્રાન્સપોર્ટેશન ફીના વળતર પેટે ગુજરાત ઓર્ગેનિક પ્રોડક્ટ્સ સર્ટિફિકેશન એજન્સી દ્વારા નક્કી થયેલ નિયમો મુજબ ખર્ચમાં ૭૫% સુધીની સહાય આપવામાં આવશે. જ્યારે અન્ય માન્ય એજન્સીઓ દ્વારા સર્ટિફિકેશન કરાવવા પર ૫૦% અથવા રૂ।. ૨૦૦૦ પ્રતિ હેક્ટરની મર્યાદામાં વાર્ષિક ધોરણે સહાય મળવાપાત્ર રહેશે. આ ઉપરાંત, સેન્દ્રિય ખેતી માટે ઈનપુટ સહાય ઘટક હેઠળ પાત્રતા ધરાવતા ખેડૂતોને રૂ।. ૫,૦૦૦ પ્રતિ હેક્ટર પ્રતિ વર્ષના ધોરણે આર્થિક મદદ મળશે, જે વધુમાં વધુ ૨ હેક્ટર એટલે કે મહત્તમ રૂ।. ૧૦,૦૦૦ સુધી પ્રતિ વર્ષ મળી શકશે.
ખેડૂતો આ યોજનાનો મહત્તમ લાભ ઉઠાવી શકે તે માટે તંત્ર દ્વારા તા. ૩૧/૦૧/૨૦૨૭ સુધીની આખરી સમયમર્યાદા નક્કી કરવામાં આવી છે. આ તારીખ પહેલાં ઓનલાઈન અરજી પ્રક્રિયા પૂર્ણ કરી લેવાની રહેશે જેથી સમયસર વેરિફિકેશન થઈને ખેડૂતોના બેંક ખાતામાં સીધી સહાય જમા થઈ શકે. આ પ્રકારની સરકારી પહેલથી રાજ્યમાં ઓર્ગેનિક ખેતીને પ્રોત્સાહન મળશે અને ધરતીપુત્રોને આર્થિક રાહતની સાથે જમીનની ફળદ્રુપતા જાળવી રાખવામાં પણ મોટો ફાયદો થશે.
