સુરત શહેરમાં આયુર્વેદિક સેવા ક્ષેત્રે ઉત્કૃષ્ટ યોગદાન આપવા માટે વંદે આયુકોન-3 કાર્યક્રમનું આયોજન કરવામાં આવ્યું હતું. સુરત ચેમ્બર ઓફ કોમર્સના નેજા હેઠળ યોજાયેલા આ ભવ્ય કાર્યક્રમમાં 1200થી વધુ ડોક્ટરો ઉપસ્થિત રહ્યા હતા અને રાજ્યકક્ષાના મંત્રી પ્રફુલ પાનશેરીયા પણ ખાસ ઉપસ્થિત હતા. આ દરમિયાન એક વ્યક્તિને આયુર્વેદ સેવા રત્ન એવોર્ડથી સન્માનિત કરવામાં આવ્યા હતા, પરંતુ આ સન્માન મળતા જ તબીબી આખા જગતમાં અને સામાજિક વર્તુળોમાં ભારે ચકચાર મચી ગઈ હતી, કારણ કે જે વ્યક્તિને આ એવોર્ડ અપાયો હતો તે અગાઉ નવસારી SOG દ્વારા નકલી ડોક્ટર તરીકે પકડાઈ ચૂકેલો હતો.
આ ઘટના પ્રકાશમાં આવતાની સાથે જ 57થી વધુ ડિગ્રીધારી આયુર્વેદિક તબીબોએ એકસાથે મળીને આ ઘટના સામે ઉગ્ર વિરોધ નોંધાવ્યો છે અને નેશનલ કમિશન ફોર ઇન્ડિયન સિસ્ટમ ઓફ મેડિસિન એટલે કે NCISM સમક્ષ લેખિત ફરિયાદ પણ કરી છે. વિવાદ વધતા આયોજક ડો. જીગ્નેશે સ્પષ્ટતા કરી હતી કે તે વ્યક્તિ મહારાષ્ટ્રના નાસિકથી બી.એમ.એસ. ડિગ્રી ધરાવતો હોવાનું કહેતો હતો અને સુરત તથા નવસારીમાં પ્રેક્ટિસ કરતો હતો, પરંતુ ગુજરાત આયુર્વેદિક કાઉન્સિલમાં તેનું રજીસ્ટ્રેશન નહોતું. બીજા દિવસે હકીકત સામે આવતા જ આયોજકોએ તાત્કાલિક તે વ્યક્તિ પાસેથી એવોર્ડ પરત ખેંચી લીધો હતો અને ખાતરી આપી હતી કે જ્યાં સુધી કાઉન્સિલમાં રજીસ્ટ્રેશન ન થાય ત્યાં સુધી તે ગુજરાતમાં પ્રેક્ટિસ નહીં કરી શકે.
આ સમગ્ર મામલાએ મોટા પાયે સવાલો ઊભા કર્યા છે કે આટલા મોટા સ્ટેજ પર કોઈ પણ પૃષ્ઠભૂમિની ઝીણવટભરી તપાસ વગર બોગસ ડોક્ટરનું નામ એવોર્ડ માટે કેવી રીતે નક્કી થઈ ગયું. સુરત ચેમ્બર ઓફ કોમર્સે પણ સ્પષ્ટતા કરી છે કે તેઓ આ બાબતથી અજાણ હતા અને સંસ્થાના વડાના આગ્રહથી સહકાર અપાયો હતો. તબીબોની સ્પષ્ટ માગ છે કે આ પ્રકારની ગંભીર બેદરકારી દાખવનાર જવાબદાર વ્યક્તિઓ અને સંસ્થાઓ સામે કડક કાર્યવાહી કરવામાં આવે, જેથી ભવિષ્યમાં આવા શરમજનક બનાવો ન બને.
