દેશમાં કથિત વોટ ચોરીના વિવાદને લઈને રાજકારણ ગરમાયું છે અને કોંગ્રેસ અધ્યક્ષ મલ્લિકાર્જુન ખડગેએ સ્પષ્ટ કર્યું છે કે લોકશાહીને બચાવવા માટે આ લડાઈ લાંબી ચાલશે. સીઈસી જ્ઞાનેશ કુમાર દ્વારા ચૂંટણી પંચમાં કરવામાં આવેલી ગેરરીતિઓ સામે વિરોધ નોંધાવવા માટે INDIA ગઠબંધન દ્વારા આગામી 30 ઓક્ટોબરે એક મોક પાર્લામેન્ટ સત્ર બોલાવવામાં આવ્યું છે. આ ઉપરાંત દેશભરમાંથી લોકો ભાગ લે તે રીતે 1 નવેમ્બરે એક વિશાળ રેલીનું પણ આયોજન કરવામાં આવ્યું છે, જેનાથી સરકાર અને તંત્ર સુધી જનતાનો અવાજ પહોંચાડી શકાય.
આ મોક પાર્લામેન્ટના આયોજન માટે શરૂઆતમાં અશોકા હોટેલ ખાતે યોજવા માટે દિલ્હી પોલીસ પાસે પરવાનગી માંગવામાં આવી હતી, પરંતુ પોલીસે મંજૂરી ન આપતા હવે આ બેઠક કોંગ્રેસ અધ્યક્ષ મલ્લિકાર્જુન ખડગેના નિવાસસ્થાને જ યોજવામાં આવશે. કોંગ્રેસના પ્રવક્તા શમા મોહમ્મદે આકરા પ્રહારો કરતા જણાવ્યું હતું કે વિપક્ષને અવાજ દબાવવાના પ્રયાસો સામે આ લડાઈ ચાલુ રહેશે. બીજી તરફ સીપીઆઈ(એમ)ના સાંસદ જ્હોન બ્રિટાસે કહ્યું હતું કે સ્પીકર અને રાજયસભા ચેરમેનને યોગ્ય નોટિસો આપવા છતાં તેને સ્વીકારવામાં ન આવતા, હવે જ્ઞાનેશ કુમારને હોદ્દા પરથી હટાવવા માટે આ સાંકેતિક મહાભિયોગ સિવાય કોઈ વિકલ્પ બચ્યો નથી.
વિપક્ષના નેતાઓનું માનવું છે કે લોકશાહી જીવંત રાખવા માટે જનતાને જાગૃત કરવી અનિવાર્ય છે અને જ્યાં સુધી કથિત ચૂંટણી ગેરરીતિઓનો જવાબ નહીં મળે ત્યાં સુધી આ વિરોધ પ્રદર્શન ચાલુ જ રહેશે. આંદોલનના ભાગરૂપે યોજાનારી આગામી 1 નવેમ્બરની રેલીમાં દેશભરમાંથી કાર્યકરો અને નાગરિકો જોડાઈને સીઈસી સામેનો રોષ વ્યક્ત કરશે. રાજકીય મોરચે આ વિવાદ આગામી દિવસોમાં વધુ ઉગ્ર બને તેવા પૂરા એંધાણ દેખાઈ રહ્યા છે.
