ઇઝરાયલમાં સામાન્ય ચૂંટણીના પ્રારંભિક વલણો સામે આવ્યા પછી પણ નવી સરકાર કોની બનશે તે બાબતે ભારે સસ્પેન્સ યથાવત છે. મતગણતરીના આંકડા મુજબ વડાપ્રધાન બેન્જામિન નેતન્યાહુના નેતૃત્વવાળા ગઠબંધનને 53 બેઠકો મળવાનો અંદાજ છે, જ્યારે વિપક્ષી નેતા ગાદી આઇઝનકોટના મોરચાને આશરે 48 બેઠકો મળતી દેખાઈ રહી છે. ઇઝરાયલની 120 બેઠકો વાળી સંસદ નેસેટમાં સરકાર બનાવવા માટે જાદુઈ આંકડો 61 સભ્યોના સમર્થનનો છે. હાલના સમીકરણો જોતા નેતન્યાહુનું ગઠબંધન બહુમતીથી 8 બેઠકો દૂર છે, જ્યારે વિપક્ષી મોરચાને સરકાર રચવા માટે 13 બેઠકોની જરૂર છે.
આ ચૂંટણીમાં આરબ રાજકીય પક્ષોને કુલ 19 બેઠકો મળવાનો અંદાજ છે, જેના કારણે હવે તેમનો ફાળો સરકાર બનાવવા માટે સૌથી મોટો ટર્નિંગ પોઈન્ટ બની શકે છે. આરબ પક્ષ રામના નેતા મન્સૂર અબ્બાસે આઇઝનકોટના નેતૃત્વમાં સરકાર બનાવવાની અડચણો દૂર કરવાની તૈયારી બતાવી છે, પરંતુ વિપક્ષના તમામ ઘટક પક્ષો આ સમર્થનને સ્વીકારશે કે કેમ તે અનિશ્ચિત છે. બીજી તરફ નેતન્યાહુએ સ્પષ્ટપણે આરબ પક્ષોના ટેકાથી સરકાર બનાવવાનો વિરોધ કર્યો છે. આ સમગ્ર રાજકીય ગરમાવા વચ્ચે અમેરિકાના પ્રમુખ ડોનાલ્ડ ટ્રમ્પે પણ નિવેદન આપીને કહ્યું છે કે નેતન્યાહુ હજુ સારી રાજકીય સ્થિતિમાં છે, જોકે ટ્રમ્પના સમર્થનથી સંસદનું ગણિત બદલાતું નથી.
ચૂંટણીના અંતિમ પરિણામો આવ્યા બાદ જ પક્ષો વચ્ચે બેઠકોની વહેંચણી અને મંત્રણાઓનો દોર શરૂ થશે. જો કોઈ પણ નેતા જરૂરી 61 નો આંકડો પાર નહીં કરી શકે તો અંતમાં રાષ્ટ્રીય એકતા સરકાર બનાવવી પડે અથવા તો ફરીથી ચૂંટણી યોજવાના વિકલ્પો ખુલી શકે છે. લાંબા સમયથી સત્તાના કેન્દ્રમાં રહેલા નેતન્યાહુ ફરીથી કમાલ કરીને ખુરશી જાળવી રાખશે કે પછી વિપક્ષ તેમને સત્તાથી બહાર ફેંકવામાં સફળ થશે, તે હવે આગામી દિવસોમાં ચાલનારા રાજકીય ખેલ પર જ નિર્ભર છે.
