સુરેન્દ્રનગર જિલ્લામાં બુટલેગરો સામે પોલીસની કાર્યવાહી વધુ તેજ બની છે, ત્યારે LCB ની ટીમને મળેલી ચોક્કસ બાતમીના આધારે ધ્રાંગધ્રા-હળવદ હાઈવે પર આવેલા સોલડી ટોલ નાકા પાસેથી એક શંકાસ્પદ ટ્રકને અટકાવવામાં આવી હતી. પોલીસે જ્યારે આ ટ્રકની તલાશી લીધી ત્યારે અંદરનો નજારો જોઈને અધિકારીઓ પણ ચોંકી ઉઠ્યા હતા. ટ્રકની આડમાં વિદેશી દારૂનો મોટો જથ્થો છુપાવીને લઈ જવામાં આવી રહ્યો હતો, જેને પોલીસે પકડી પાડીને બુટલેગરોની મોટી ચાલને નિષ્ફળ બનાવી દીધી છે. LCB ની આ ઝંઝાવાતી રેડથી ગેરકાયદેસર પ્રવૃત્તિઓ ચલાવતા તત્વોમાં નાસભાગ મચી ગઈ છે.
પોલીસ તપાસ દરમિયાન આ ટ્રકમાંથી વિદેશી દારૂ અને બીયરનો અધધ જથ્થો મળી આવ્યો હતો, જેમાં ઇંગ્લિશ દારૂની નાની-મોટી કુલ 3684 બોટલો કિંમત રૂ. 8,20,744 અને 840 નંગ બીયર ટીન કિંમત રૂ. 1,17,600 મળી કુલ રૂ. 9,38,344 નો પ્રોહિબિશનનો માલ જપ્ત કરાયો છે. આ ઉપરાંત ટ્રક, મોબાઈલ અને અન્ય સાધનો મળીને કુલ રૂ. 29,79,344 નો મુદ્દામાલ પોલીસે કબ્જે કર્યો છે. સ્થળ પરથી રાજસ્થાનના સિંગાડિયા ગામના બબલુસિંગ પુનમસિંગ રાવત નામના એક આરોપીની ધરપકડ કરવામાં આવી છે, જ્યારે ટ્રક માલિક, રાહુલ બિયાવર અને એક અન્ય અજાણ્યો શખ્સ ફરાર થઈ ગયા છે.
આ ગેરકાયદેસર દારૂના નેટવર્ક અંગે પોલીસે સઘન પૂછપરછ શરૂ કરી છે અને ફરાર થયેલા આરોપીઓને ઝડપી પાડવા માટે ચક્રો ગતિમાન કર્યા છે. આ દારૂનો જથ્થો ગુજરાતમાં કઈ જગ્યાએ અને કોને સપ્લાય કરવાનો હતો તે બાબતની ઊંડાણપૂર્વક તપાસ ચાલી રહી છે. પોલીસના આ કડક પગલાંથી આગામી સમયમાં બુટલેગરોની ઓપરેટિંગ સ્ટાઇલ પર મોટી રોક લાગશે અને આ રેકેટના મૂળ સુધી પહોંચવા માટે પોલીસ વિભાગે વધુ ટીમો કામે લગાડી છે.
