બનાસકાંઠા જિલ્લામાં ચાલુ વર્ષે વરસાદની ભારે અછત અને પાણીના અભાવે ખેતરોમાં ઉભો પાક સુકાઈ રહ્યો છે, છતાં સરકાર દ્વારા જિલ્લાને દુષ્કાળગ્રસ્ત જાહેર કરવામાં ન આવતા સ્થાનિક ખેડૂતોમાં ભારે રોષ અને અસંતોષ વ્યાપી ગયો છે. સરકાર અન્ય જિલ્લાઓ સામે બનાસકાંઠા પ્રત્યે ઓરમાયું વર્તન દાખવી રહી હોવાનો ગંભીર આક્ષેપ કરી ભારતીય કિસાન સંઘ અને મોટી સંખ્યામાં ખેડૂત આગેવાનો પાલનપુર ખાતે કલેકટર કચેરીએ એકત્રિત થયા હતા. ખેડૂતોએ તાત્કાલિક ધોરણે જિલ્લાને દુષ્કાળગ્રસ્ત જાહેર કરવાની માંગ સાથે આવેદનપત્ર પાઠવ્યું છે અને સરકાર સામે આક્રમક મૂડ બતાવ્યો છે.
જિલ્લામાં પુરતો વરસાદ ન થવાથી ખેડૂતોની સ્થિતિ અત્યંત દયનીય બની ગઈ છે, ભૂગર્ભ જળસ્તર ખૂબ જ ઊંડા જતા મોટાભાગના ડેમ અને તળાવો ખાલીખમ પડ્યા છે. સરકાર દ્વારા તાજેતરમાં 4 જિલ્લાઓને દુષ્કાળગ્રસ્ત જાહેર કરવામાં આવ્યા છે, પરંતુ ખેતી અને પશુપાલન પર નભતા બનાસકાંઠાની વાસ્તવિક પરિસ્થિતિ તરફ આંખ આડા કાન કરવામાં આવી રહ્યા છે. અગાઉ ગત 05/10/2026 ના રોજ પણ આ અંગે રજૂઆત કરવામાં આવી હતી, પરંતુ તંત્ર દ્વારા કોઈ જ સકારાત્મક પગલાં ભરવામાં આવ્યા ન હોવાથી ખેડૂતોમાં નિરાશા જોવા મળી રહી છે.
કિસાન સંઘે સરકારને સ્પષ્ટ અને ખુલ્લી ચીમકી આપતા જણાવ્યું છે કે જો વહેલી તકે આ માંગણી નહીં સંતોષાય, તો આગામી 30 મી તારીખે વડાપ્રધાનના બનાસકાંઠા પ્રવાસ દરમિયાન ખેડૂતો રસ્તા પર ઉતરીને ઉગ્ર વિરોધ પ્રદર્શન કરશે. કાગળ પરના આંકડા અને જમીની હકીકત વચ્ચે મોટો તફાવત હોવાથી ખેડૂતો હવે આરપારની લડાઈના મિજાજમાં છે. આ ગરમાગરમી વચ્ચે હવે સરકારી તંત્ર ખેડૂતોની આ વેદના સાંભળીને આગામી સમયમાં શું નિર્ણય લે છે તેના પર સૌની નજર ટકેલી છે.
