બિઝનેસ જગતમાંથી એક મોટા સમાચાર સામે આવ્યા છે. સપ્ટેમ્બર મહિનામાં ભારતમાંથી બહારના દેશોમાં થતું રોકાણ એટલે કે આઉટવર્ડ FDI ઘટીને 4.34 બિલિયન ડોલર પર આવી ગયું છે. જો કે, જો આંકડાઓની વાત કરીએ તો ચિત્ર થોડું અલગ છે. ગયા વર્ષના સપ્ટેમ્બર મહિનાની સરખામણીએ આ આંકડામાં 14 ટકાનો વધારો ચોક્કસ થયો છે, પરંતુ જો ઓગસ્ટ મહિનાની સાથે સરખામણી કરીએ તો તેમાં સીધો 37 ટકાનો મોટો ઘટાડો જોવા મળ્યો છે.
આ ઘટાડા પાછળનું મુખ્ય કારણ ઇક્વિટી કમિટમેન્ટ અને લોન્સમાં આવેલી નરમાઈ છે. ઓગસ્ટ મહિનાની સરખામણીએ સપ્ટેમ્બરમાં ઇક્વિટી કમિટમેન્ટમાં 20 ટકાનો ઘટાડો થયો છે અને તે ઘટીને 3.26 બિલિયન ડોલર પર પહોંચી ગયા છે. બીજી બાજુ, વિદેશમાં રહેલી સબસીડિયરી કંપનીઓને આપવામાં આવતી લોન્સ સપ્ટેમ્બરમાં થોડી વધીને 549 મિલિયન ડોલર થઈ છે. આમ છતાં એકંદર આંકડાઓ પર તેની ખાસ અસર પડી નથી.
આ વિદેશી રોકાણ કરનાર કંપનીઓમાં સન ફાર્મા જેવી દિગ્ગજ કંપનીઓ મોખરે રહી છે, જેમણે મોટા પાયે ઇક્વિટી આઉટફ્લોમાં યોગદાન આપ્યું છે. ગ્લોબલ માર્કેટમાં આર્થિક હિલચાલ અને કંપનીઓની વ્યૂહરચના વચ્ચે વિદેશમાં થતા આ રોકાણના આંકડા બિઝનેસ વર્તુળોમાં ચર્ચાનો વિષય બન્યા છે. હવે આગામી મહિનાઓમાં માર્કેટની ચાલ કેવું રૂપ ધારણ કરે છે અને રોકાણકારોનો મૂડ કેવો રહે છે તે જોવું રસપ્રદ રહેશે.
